Footer

Tricycle fare hike, nakiddaw

VIGAN CITY – Saganaan dagiti agindeg ti Vigan ti manamnama a pannakaipangato ti plete iti traysikel kalpasan ti itatapog ti baro a tawen.

Insingasing ni Konsehal George Villanueva iti sessionda makalawas sakbay ti Paskua ti pannakairaman iti calendar of business ti tricycle fare hike tapno trataren ti sangguniang panlungsod  ngem saan a nagtuloy gapu ta impalawag ni Vice Mayor Ryan Singson a pakaseknan iti kuarta daytoy isu a masapul a dumalan pay iti first, second ken third reading.

Nupay kasta, kinuna ni Singson a masapul a dumalan pay  iti public hearing ti ordinansa a mangingato iti tricycle fare hike.

“Iti rule ngamin, when it comes to money matters, masapul a dumalan (ordinansa) iti first, second and third reading,” kinuna ni Singson.

Segun ken ni Villanueva, adda naawatna a petision manipud kadagiti traysikelan ditoy siudad a dumawdawat a maipangato ti plete iti P10.

Kinuna pay ni Villanueva nga adda rollback ti plete ti traysikel idi 2008 ngem adda gentlemen’s agreement a maingato ti plete iti kanito a dumanon iti nasurok a P50 kada litro ti presio ti gasolina.

Ngem segun ken ni Konsehal Franz Ranches, kasapulan a mangidatag manen dagiti traysikelan iti sabali a petision tapno trataren ti sangguniang panlungsod.

Kinuna ni Ranches a masapul a masurot ti proseso iti pannakatratar ti petision dagiti traysikelan.

Kinuna met ni Singson a kasapulan a mangangay pay nga umuna ti komite ti transportasion iti public hearing tapno maammuan ti karirikna dagiti agindeg iti Vigan.

“Narigat a basta lattan maited ti tricycle fare hike nga awan ti public hearing,” kinuna ti bise mayor.

Kabayatanna, pabor dagiti agpaspasada iti traysikel iti Sto. Domingo ti panagreportda nga umuna iti police station sakbay a mapanda agitulod iti pasaheroda nangruna iti rabii.

Kinuna ni George Butardo, presidente ti garupo dagiti traysikelan, a diskresion ti agpaspasada ti mapan agpirma iti log book iti police station nangruna no adda panagduaduana iti katatao dagiti pasaherona.

Inaprobaran itay nabiit ti sangguniang bayan ti Sto. Domingo ti ordinansa nga agpirma nga umuna dagiti agpaspasada iti traysikel iti log book ket ilanadda ti nagan dagiti pasaheroda ken ti lugar a papananda sakbay a itulodna dagitoy.

Segun iti chairman ti komite ti peace and order and public safety a naputar ti nasao nga ordinansa agsipud kadagiti napasamak a krimen iti kallabes a nakabiktimaan dagiti agpaspasada iti traysikel.#