Triggerman, kaduana, nakasuan iti murder

CANDON CITY – Saan laeng a panagikut iti illegal nga armas no di pay murder ti sanguen ti triggerman ken ti kaduana iti pannakapapatay ti maysa a balo iti tinabunuanna a natayan iti Galimuyod kalpasan a impaima ti polis ti kasoda iti provincial prosecutor’s office, Vigan City.

Iti pannakaisurat daytoy, nainget ti panangguardia dagiti polis ti Galimuyod ken Candon City iti ospital a pakaag-agasan ti sugatda da Richard Calindas y Baltaz, 33, baro, residente iti Barangay Bagani Gabor ken Rogelio Ballocanag y Lozano, 35, baro, residente iti Barangay Oaig Daya ditoy siudad, akusado iti pannakapapatay ni Macario Pacquing II y Agbulos, 31, balo, residente iti Barangay San Jose, Candon City idi alas 10:15 ti rabii ti Nobiembre 10 bayat ti kaadda ti biktima iti maysa a natayan iti Barangay Poblacion, Galimuyod.

Ni Calindas ti mapapati a triggerman a nanggudas ken ni Pacquing. Saan a naipalgak no ania ti motibo ti pammapatay.

Mapapati a kellaat lattan a binunot ni Calindas ti paltogna a cal. 45 sana pinaltogan iti nagsasaruno ti barukong ti biktima bayat ti kaaddada iti natayan.

Naitaray ti biktima iti Candon City Hospital ngem naideklara nga awanen ti biagna.

Naglibas dagiti suspek a naglugan iti Honda XRM nga agturong iti laud a direksion idi pinasardeng ida dagiti polis Galimuyod iti impasdekda a checkpoint. Ngem intuloy dagiti suspek a pinakaskas ti motorsikloda a nakaigapuan ti panangkamat dagiti polis ida.

Pinaputokan dagiti suspek dagiti kimmamat a polis ket bimmales dagiti naud-udi a nakatiruan ti pingping ti ubet ni Calindas ken ti kannigid a saka ni Ballocanag.

Narekobre dagiti polis ti maysa a cal. 45 a mapapati a naaramat iti pammapatay ken maysa a kapsula, kasta met iti dua a kapsula iti lugar a nakapaltogan ni Pacquing.

Kabayatanna, sumango met iti panagsalungasing iti RA 7610 ti maysa a lumugar iti Barangay Besalan, Sta. Cruz, Ilocos Sur gapu iti illegal a panagpaputokna iti paltog idi rabii ti Nobiembre 10.

Iti report nga impatulod ti polis ti Sta. Cruz, nagpulong da Barangay Captain Elomo Valdez, Kagawad Bonifacio Valdez ken Noel Soliven y Habon, 14, estudiante, agpapada a residente iti nadakamat a barangay nga idi agarup 9:15 ti rabii ti nasao a petsa, bayat ti panagtugtugaw da Soliven ken dagiti kakabagianna iti papag iti balay ni Kagawad Valdez, immasideg ti suspek a mapapati a nabartek ket inlodna ti pistolana sa nagpaputok iti ngato.

Timmaray ni Soliven ket kinamat ti suspek ngem naanawa dagiti kakabagian ti immuna.

Nakarekobre dagiti nagresponde a polis iti maysa a bala para iti cal. 9 mm a mapapati nga inaramat ti suspek a nagpaputok.

Mapapati a dati a susik ti nakairamutan ti panagpaputok.#