Footer

Triggerman, utek iti pannakapapatay ti Singaporean national, nakasuan iti murder

BANTAY, Ilocos Sur – Nakasuan iti murder iti Vigan city prosecutor’s office ti mapapati nga utek ken ti tinangdananna a triggerman iti pannakapapatay ti maysa a Singaporean national iti uneg ti maysa a hardware store idi Mayo 23 daytoy a tawen.

Innaganan ni Provincial Director Police Senior Supt. Eduardo Dopale, Jr. ni Jocelyn Peria, 43, balo, ti mapapati nga utek iti pammapapatay idinto a ni Jeslie Tugadi, 23, baro, ti hired killer a nangpapatay ken ni Cyril Gomez, 67, Singaporean national a retirado nga Army Major, agnaed iti Barangay San Julian.

Kinuna ni Dopale a ti saan a panagkinnaawatan da Peria ken ti Singaporean national mainaig iti pautang ti mapapati a gapu iti krimen.

Mapapati a nakautang ni Peria ken ni Gomez iti P300,000.

Iti immun-una nga interbiona iti media, kinuna ni Marilou Gomez, asawa ti biktima, a dakkel ti pautang ti lakayna a puon ti nangidarumanna kadakuada.

Naipila pay ti kaso nga illegal possession of firearms ken obstruction of justice maikontra kada Peria ken ni Juanito Tugadi, 50, ama ti triggerman, kalpasan a nakakumpiska  dagiti nagtipon a bunggoy ti Philippine Intelligence Unit ken ti Criminal Investigation and Detention Group (CIDG) ti Abra ken Ilocos Sur kadagiti armas bayat ti insayangkatda a panagsukisok iti pagtaengan ni Tugadi iti sitio Banaoan, Barangay Budac, Tayum, Abra.

Kinuna ni Police Chief Inspector Villaflor Banawagan ti CIDG a nakakumpiskada iti  cal. 45, cal. 38 ken shotgun iti pagtaengan ni Tugadi.

Mapapati a panggep ni Tugadi ti makiranget kas paneknekan dagiti naikasa a paltog ngem naglemmeng iti dakkel a karton idi makitana nga adu dagiti simmangpet a polis.

Kinuna ni Banawagan a dakkel ti naitulong ti recording ti CCTV  camera a naimuntar iti uneg ti New Born Hardware Store iti pannakatiliw ti hired killer a nanggudas ken ni Gomez.

Kinuna ni Banawagan a narekobreda ti kallugong nga inaramat ni Tugadi iti panangpapatayna ken ni Gomez kas nairekord iti CCTV camera.

Kas maibatay iti recording, nakatugaw ti biktima iti sanguanan ti lamisaan ti cashier ti pagtagilakuan idi immasideg ti suspek a nakakallugong, nakadiaket, nakashortpan, ken nakatisert iti gray sana pinaltogan ti biktima.

Naglibas ti suspek babaen ti panagluganna iti nangisit nga XRM a motorsiklo a minaneho ti sabali a lalaki a mapapati a nagpaay a lookout iti pannakaisayangkat ti krimen.

Kinuna ni Banawagan a nainbolbar ni Tugadi kadagiti sumagmamano nga insidente ti pammaltog.#