Trike driver, natupakan iti bato, natay

SUYO, Ilocos Sur – Nagmalas la ketdin daytoy a tricycle driver ta natupakan iti bato a naggapu iti bantay bayat ti ilalasat ti luganna sadiay Sitio Kiblongan, Uso ditoy nga ili idi aldaw ti Enero 17.

Nadatnan dagiti nagresponde a polis a nakadalutaytay iti kalsada a sakup ti nadakamat a lugar ni Domingo Garcia y Bernardez, 59, awanan asawa, ken residente iti Barangay Concepcion, Cervantes, Ilocos Sur.

Kas maibatay iti report, inarkila dagiti agassawa a Dominador Inton y Valdez, 54, ken Rosario, 52, residente iti Barangay Rosario, Cervantes ti traysikel ni Garcia a mapan makimiting iti Barangay Uso, Suyo iti dayta nga aldaw.

Kabayatan ti panagdaliasat ti traysikel iti Sitio Kiblongan, Uso, nagtulid dagiti bato manipud iti bantay ket direkta a nagtupakda ken ni Garcia a puon ti nakaidalutaytayanna iti kalsada.

Intaray dagiti immarayat a personnel ti Suyo Rural Health Unit ni Garcia iti Tagudin General Hospital and Capillarisis Center, Tagudin, Ilocos Sur ngem naideklarar nga awanen ti biagna.

Saan a naan-ano dagiti dua a pasahero ti biktima.#