Tropa ti gobierno, nagsaruno nga inambos ACC-NPA-Ilocos Sur

BANTAY, Ilocos Sur – Sabali manen a panagambos ti inwayat dagiti kamkameng ti New People’s Army sadiay Sitio Kingking, Barangay Malideg ditoy nga ili a nakagudasan ti maysa a soldado ken nakasugatan dagiti innem pay idi parbangon ti Mayo 2.

Segun iti report manipud iti Quirino police station a naipatulod iti Provincial Police Office, idi agarup 4:00 ti agsapa ti Mayo 2, sangapulo ket tallo a miembro ti Bravo Company, 50th IB, PA a nakabase iti Cervantes, Ilocos Sur, ti nakalugan iti KM 450 nga agturong iti Quirino ket iti nadakamat a sitio, tinambang ida dagiti mapapati a kameng ti CNN a nagresulta iti pannakatay ti maysa a soldado ken pannakasugat dagiti innem pay.

Nainaganan ti nagudas a soldado a maysa a PFC Miguel B. Lumade, taga-Cabagan, Isabela ken dagiti nasugatan a da Ismael Oreña, 28, taga-Isabela; CPL Pedrico A Miguel, 36, taga- Tagum, Davao City; PFC Crisogolo Tuliao, 38 years, taga-Cagayan; PFC Harold Morareng, 26; PFC Allan Jay Lomas-e; ken PFC Hector Zalun.

Segun ken ni Ltc Richard N. Sibayan, commanding officer, 50th Infantry Battalion, 5ID, PA, dagiti natambang a tropa ket kameng ti Peace and Development Teams ti 50th Infantry Battalion, 5th Infantry Division, Philippine Army ket agsubli koma dagitoy iti baseda kalpasan ti yaatendarda iti maysa a miting kadagiti lokal nga opisial ti Abra maysa nga aldaw sakbayna.

Kinuna ni Sibayan a nagturong ti tropa iti Abra ket timmulongda kadagiti personnel dagiti ahensia ti gobierno a nakikoordinar kadagiti lokal nga opisial ti nasao a probinsia para iti implementasion ti pannakapasayaat ti Quirino-Bolingon road projects ken iti pannakatarimaan ti rangtay a madalanan ti nasao a kalsada.

Dagdagus a naibaon dagiti reinforcements troops ken medical teams iti nakapasamakan ti ambos tapno matulongan dagiti soldado. Naipan ti natay ken nasugatan a soldado iti ospital sadiay Quirino para iti pannakaagasda idinto a naiwayat ti hot pursuit operations kadagiti naglibas a kameng ti NPA.

Kinuna ni Sibayan a tartaraudi a kamkameng ti NPA dagiti nangiwayat iti panagambos ket mamati a nagsagrapda met kadagiti casualties gapu kadagiti dara ken narekobreda a ramit dagitoy iti nagpuestoanda.

Daytoy ti maikadua a daras a naambos dagiti tropa ti gobierno iti las-ud ti dua nga aldaw.

Idi agarup agarup 9:35 ti bigat ti Mayo 1, inambos dagiti kameng ti NPA ti tropa dagiti soldado sadiay Barangay Remedios, Cervantes, Ilocos Sur, sumagmamano a kilometro ti kaadayona manipud iti baseda.

Ngem iti waragawag ken ni Armando Silva, spokesperson ti NPA Alfredo Cesar Command, tallo a soldado ti nagudas idinto a nasugatan ti dua iti panagambos iti Cervantes idinto nga 4 ti natay ken 6 ti nasugatan iti panagtambang iti Quirino.

Iti met panagimbestiga dagiti polis-Cervantes, nakarekobreda iti dua a kapsula manipud iti M14 ken 4 a kapsula manipud iti M16 iti nakapasamakan ti panagambos.

Maysa a cal. 45, Remington Pistol nga addaan iti maysa a magasin nga adda iti kustodia ni Sibayan ti naipaima iti SOCO team para iti ballistics ken cross matching examination.

Kanaig daytoy, naikiddaw ti firearm verification iti FESAGS ISPPO tapno maammuan no asino ti nairehistro nga akinkukua iti nasao a paltog, kasta met dagiti fragments manipud iti mapapati nga IED a napabettak iti ambush site.

Nakarekobre pay dagiti inbestigador iti nagpuestuan dagiti nagtambang iti maysa a lunch box, water bag, ken maysa a water tumbler.

Nagturong a mismo ni Police Senior Supt. Nestor Eswagen Felix ken ti quad staff iti Cervantes ket imbilinna bayat ti case conference a naaramid iti police station ti pannakaiwayat iti naing-inget pay nga inbestigasion mainaig iti nasao a panagtambang.

Segun iti parasao ti Alfredo Cesar Command, naiwayat ti panagtambang kadagiti tropa ti 50th IB tapno maited ti hustisia kadagiti mapapati a biktima ti human rights nga inwayat ti nasao a battalion ken iti mapapati a panangikaluyada iti interes dagiti dadakkel a kompania ti minas.

Ngem kinuna ni Sibayan nga al-allilawen laeng ti NPA dagiti tattao tapno madadael ti kredibilidad ti Philippine Army.
Indagadag pay ni Sibayan a no sinsero ti NPA a mangitandudo iti pagimbagan dagiti tattao, madadaan ti 50th IB a makidialogo kadakuada tapno magun-od ti urnos, linak, ken kappia.

“Pilipinotayo amin, saan koma a datayo ti agdidinnadael ken agpipinnatay,” kinuna pay ni Sibayan.#