Truck a nagkarga iti naputputed a kayo, nasalamaan dagiti polis

SALCEDO, Ilocos Sur – Maysa a mini truck a nagkarga kadagiti naputedputed a sagat ti nasalamaan dagiti polis a maibiahe idi Enero 25.

Nagresponde dagiti polis idi nakaawatda iti report nga adda grupo dagiti lallaki nga agikarkarga kadagiti naputedputed a sagat iti mini truck sadiay Barangay Maligcong ditoy nga ili iti nadakamat a petsa.

Kinumpiska dagiti polis ti lugan ken ti kargana idi awan ti maipakita ni Wilbert Palacpac y Castillo, 40, residente iti Barangay Balaleng Centro, Bantay, Ilocos Sur a dokumento para iti pannakaibiahe dagiti kayo.

Naipaiman dagiti kayo iti DENR-Tagudin para iti pannakabilang ken pannakarukodda iti sanguanan ni Manuel Basling, forester-ranger ti nasao nga ahensia.#