Truck inaradona dua a balay, agapo natay

STA. CRUZ, Ilocos Sur – Natay ti maysa a baket ken ti apona idi inarado ti maysa a truck ti dua a pagtaengan sadiay Barangay Capariaan, ditoy nga ili idi Hulio 18.

Nabigbig dagiti biktima a da Caridad Peralta, 49, ken ni Charisselle Banguyen, 10 bulanna, agpada a residente iti nadakamat a lugar.

Segun ken ni COP Faustino Bandao, agpaabagatan a direksion ti International trailer truck idi mapapati a napukaw ti direksionna ket sinapgidna ti maysa a nakaparking a traysikel,  dinalapusna  ti bungalow a balay da Caridad sana dinungpar ti sabali pay a balay.

Gapu iti pigsa ti panangdungpar ti truck iti balay dagiti biktima, natebbag ti kongkreto a mapapati a nangtupak kadagiti biktima a puon ti ipapatayda.

Naitaray ti drayber ti truck iti Candon City Hospital gapu iti fracture iti sakana ken abagana.#