Footer

Truck, nahold-ap, P138,000 intaray dagiti mannanakaw

SUGPON, Ilocos Sur – Tallo nga armado a lalaki ti nanghold-ap iti maysa a truck bayat ti panagdaliasatna iti asideg ti karayan iti Barangay Poblacion ditoy nga ili idi sardam ti Enero 26 ket kinasakasda ti kuarta a pagbayad kadagiti agmulmula iti ube ditoy.

Nagreport iti polis babaen ti selpon ti maysa a managan Brenda Baguso y Segundo a hinold-ap ti tallo a lalaki a nagaruat iti bonite ti maysa nga ISUZU Forward truck  bayat ti panagdaliasatna iti trail road iti Amburayan River a sakup ti Barangay Poblacion ditoy nga ili.

Segun iti inisial a panagimbestiga dagiti nagresponde a polis, agturong ti nasao a lugan iti Barangay Caoayan ti nadakamat nga ili iti agarup alas 6:30 iti sardam ti Enero 26 idi kellaat a nagparang iti sanguanan ti truck dagiti tallo a suspek a nagaruat iti bonite sada imbilin iti drayber a nainaganan iti Levisteng Sakiwad y Maday-a, 40, naasawaan, residente iti Barangay Ris-ing, Bangar, La Union nga isardengna ti lugan.

Dinagdagus ti maysa kadagiti suspek ti immuli iti truck sana pinaltogan ti drayber a nakasugatan daytoy iti makannigid a paset ti tengngedna.

Nagpuesto met dagiti dua a suspek iti makannawan a paset ken iti likud ti truck sada impakdaar ti hold-ap iti Tagalog.

Iti butengna, sigida nga inyawat ni Graal Dapalog y Tudlem, 40, naasawaan, residente iti Barangay Poblacion ti nadakamat met laeng nga ili, ti kuartana nga agdagup iti P138,400 iti maysa kadagiti hold-aper.

Naglibas dagiti suspek idinto nga imballaagda kadagiti pasahero ti truck nga awan ti sumurot.

Intaray dagiti nagresponde a polis ni Sakiwad iti Tagudin General Hospital sa naiyalis iti Ilocos Regional Hospital, San Fernando City.

Naammuan ken ni Dapalog a bayad iti ube nga indeliber sakbayna dagiti miembro ti Ube Growers Association manipud dagiti nadumaduma a barangay ti Sugpon iti Baguio City ti nahold-ap a kuarta.

Di pay nabigbig dagiti nangisayangkat iti hold-ap ken no kasano a naammuanda nga adda dakkel a kantidad nga imet ni Dapalog.#