Truck, natnag iti rangkis

BANTAY, Ilocos Sur –  Maysa a dump truck a nagkarga iti bato ti naireport a natnag iti rangkis sadiay Sitio Baoay, Paing ditoy nga ili idi malem ti Disiembre 17.

Nagsagrap ni Mario Cardenas y Pido, 36, naasawaan, residente iti Barangay Sagneb, ditoy nga ili ken drayber iti Isuzu 10 wheeler dump truck iti dunor iti makannigid a tumengna ket intaray dagiti nagresponde a polis iti Gabriela Silang General Hospital, Vigan City para iti pannakaagasna.

Segun iti report, agpaamianan a direksion ti truck ngem dina nabaelan ti panagsang-atna iti kalsada gapu iti nadagsen a kargana ket naalus-os a paatras.

Naimbag ta nakatapuak ni  Cardenas sakbay a natnag ti truck iti walo kadapan ti kaunegna a rangkis ti maysa a waig iti nadakamat a lugar.#