Tultulang ti tao, nasarakan iti bantay

BURGOS, Ilocos Sur – Tultulang ti tao ti naduktalan ti maysa a mangnguong iti bantay iti nagbeddengan ti Barangay Pang-ot, Pilar, Abra ken Barangay Lubing ditoy nga ili idi malem ti Agosto 28.

Inreport ni June Soliven ken ni Barangay Captain Rosario Balneg ti nasarakanna a tultulang ti tao a mapapati a babai bayat ti panagbirokna iti uong iti nadakamat a lugar ket dagus met nga impakaammo daytoy iti police station.

Iti panagimbestiga da Chief Inspector Arsenio T. Ramos, OIC ti Burgos Police Station, ken kameng ti SOCO ti Candon City nga indauluan ni Chief Inspector Meilani Joy Ordoño, nakaaruat ti biktima iti berde a t-shirt nga addaan iti kuelio ken stripe brown short ken mapattapatta nga agtayag iti uppat a kadapan ken innem a pulgada.

Nakarekobreda pay dagiti inbestigador iti mapapati a crime scene iti maysa a paris a sinelas, ken sensilio iti nadumaduma a denominasion nga agdagup iti P19.00.

Iti pannakaisurat daytoy, di pay nabigbig ti biktima.#