TUNGTONG-ARUBAYAN: Kaasi dagiti inosente a mapabasol iti krimen

Sumagmamano a krimen ti nagsasaganad a napasamak iti Ilocos Norte a pakairamanan ti pannakaambush ti maysa a pulis, pannakapapatay ti maysa a kapitan ti barangay, pannakamasaker ti maysa a pamilia ken ti pannakapapatay ti presidente ti board ti Ilocos Norte Electric.

Ngem linagidaw ni Badoc Mayor Tomas Toralba ti nadaras la unay a pannakaitudo ken pannakemmeg dagiti kalianna kas suspetsa kadagiti naisayangkat a pammapatay. Maladingitan ti mayor ta tunggal adda mapasamak a krimen iti probinsia, dagiti kailianna a taga-Badoc ti alisto nga itudo ken kemmegen dagiti pulis a kas suspetsa. Kinunana a gapu iti kastoy nga aramid dagiti pulis, maaw-awaganen ti lugarda nga umok dagiti kriminal ken hired killers.

Kinuna pay ti mayor a saan koma nga agdardarasudos dagiti pulis nga agimbestiga ken agkemmeg lattan kadagiti kalugaranna tapno saan a mairaman dagiti inosente a kailianna ken saan a maparnuay ti saan a nasayaat nga impresion ken ladawan dagiti agnaed iti Badoc.

Mainaig iti pannakapapatay ti presidente ti INEC board, pinaglibakan ti suspetsa a ni Saturnino Pagaling, taga-Barangay Pagsanajan, Badoc nga awan ti pannakainaigna iti pammapatay a kas iti parparuaren ti PNP. Indariragna ti nainget a panagimbestiga dagiti polis tapno matiliw ken makasuan ti pudno a pimmatay, saan nga isuda nga inosente a sibilian.

Madakamat pay ditoy nga iti napalabas a naangay a 5-Pillars for Justice meeting iti Marcos Hall of Justice iti Laoag, mapapati nga inannugot ti PNP nga awan listaanda iti kinaasino dagiti mammapatay ken dagiti akusado iti agsusukot a kaso ti pammapatay iti probinsia, banag a saan a nagustuan ni Executive Judge Conrado Ragucos. Nasdaaw met ni Atty. Mariano Nalupta, Jr., dati a presidente ti Integrated Bar of the Philippines iti probinsia, iti mapapati a kinaawan ti listaan ti PNP iti kinaasino dagiti masuspetsa a mammapatay iti probinsia.

Makisimpatiakami ken ni Mayor Toralba iti daytoy a sentimientona. Saan a maikanatad a no adda mapapatay iti Ilocos Norte, taga-Badoc lattan ti tuduen wenno atapen dagiti polis a nagisayangkat iti krimen wenno hired killers agsipud iti dakes nga imahe nga itedna iti nasao nga ili. Saan a rumbeng a madagdagus a mapagatapan wenno masuspetsa dagiti agnaed ditoy nga ili a nagisayangkat iti krimen. Mangiwayat koma ti kapolisan iti naun-uneg nga imbestigasion ken paggunayenda a naannayas ti intelligence networkda. Nasken ti panagtanang, panangamiris kadagiti ebidensia sakbay nga iwayat ti panagaresto tapno dagiti laeng pudno a nakabasol ti maikursong iti pagbaludan a saan ketdi a maysa nga inosente iti krimen.

Itay nabiit, naipadamag ti pannakatiliw ti maysa a maatap a hired killer a nangisayangkat iti krimen. Naimatangan a mismo ti maysa a polis ti pammapatay. Iti panaglibas dagiti kriminal kalpasan ti pammapatay, pinaltogan ti polis ti suspetsa a nakatnagan daytoy iti nagsakayanna a motorsiklo. Tiniliw dagiti polis ti suspetsa ngem nakalibas ti kaduana. Ngem iti pannakapalutpotna, limtuad a saan a taga-Badoc ti suspetsa.

Iti daytoy a napasamak, saan ngarud a maikanatad a suspetsaen lattan a taga-Badoc dagiti hired killer iti probinsia. Ken liklikan koma dagiti kameng ti PNP a tiliwen lattan ti asinoman a sibilian gapu laeng iti suspetsa a hired killer daytoy. Kaasi dagiti maaresto nga inosente a tattao nga awan a pulos ti pannakainaigda iti maysa a pammapatay wenno krimen.#