TUNGTONG-ARUBAYAN: MaƱana habit: lapped iti panagdur-as

Narigat a masarakan iti English dictionary ti balikas a maƱana habit. Uray kasano ti panangukag-ukag iti diksionario, uray no iklik ti built-in dictionary ti MS Word, awan mabasa wenno mabirokam. Apay a kastoy? Ngamin nagtaud daytoy a balikas manipud kadagiti Kastila. Maysa kadagiti nagkaadu nga Spanish word a nailaga iti lengguahetayo a Pinoy. Nainayon a termino nga idi agangay naitiponen. Iti ababa a pannao, inadaptartayo daytoy balikas.

Ta ania aya ngamin ti maƱana habit? Balikas nga inton bigat ti kayatna a sawen. No koma adda aramidem ita ket ipabigatmo wenno itantanmo. Ti makadakes, no maipabigat manen ken manen dayta a bigat a saanen nga aggibus. Adda latta kabigatanna kadagiti managitantan.

Ngem saan a makatulong iti dur-asan daytoy nga aramid no di ket ad-adda pay nga imamegna ti kasasaad ken saan a pannakatungpal ti wayat wenno kayat nga iringpas wenno palpasen. Nupay adda naan-anay a panawen nga aramiden ti kayat nga iringpas, gapu ta nasurot daytoy nga aramid ti managsulsulit, naitantan ti tiansa a dumur-as. Pagangayanna, napukaw wenno naiyaw-awan dayta a tiansa.

Makapamisuot pay ti kastoy a tabas wenno aramid. Makaali pay. Kas pagarigan ta adda papanam ket naayabanka: ā€œInton bigat daytan, umayka ketdi ditoyā€¦ā€ rimmimbaw ti panangitantan iti panggep nga aramiden wenno iringpas. Naipabigat ti aramiden. Naitantan. Naitungtungkua.

Adda daydiay pagsasao: Dimo aramiden inton bigat ti maaramidmo iti agdama. Napintek a palagip. Dayta ti sursuroten dagiti tattao nga addaan iti nasinop ken organisado nga aramid. Kadagitoy a tattao, awan ti pakaburiboranda a kamaten, lalona ti panawen. Adayo a mapasamak dayta a banag kadagitoy a tattao ta nailasagdan nga aramid dayta kinasinop wenno kinaorganisado.

Nasken kadi nga organisado dagiti aramid? Nasken a surotentayo tapno saan a maitawtaw wenno maiyaw-awan dagiti panggeptayo nga ileppas wenno iringpas tapno naannayas latta ti sursurotentayo a dana ti biag.

Itay nabiit, adda naipadamag a makapamisuot a pasamak – nagdudupudop dagiti tao a mapan agrehistro iti maudi nga aldaw iti Commission of Elections. Pagangayanna, saan laeng a dagiti mangimaton iti COMELEC ti nabannog no di pay dagiti usarenda a machine ken devices. Ti makadakes, dagiti pay agserserbi ti napabasol iti saan a pannakarehistro dagiti kimmamakam iti maudi nga aldaw ti registrasion. Ne, saan kadi aya nga immabut iti sangapulo a bulan ti kaunday dayta a registration ken validation dagiti botante? Ania ti napasamak? Nginilaw dagiti nakatapaya ken agdudungsa nga empleado. Sa ita ta kaaldawan ti deadline, sada aggigiddan a mapan? MaƱana habit!

No koma ta awan dagita a panagitungtungkua iti aramiden, nawaya koma ken nasimbeng ti nakem iti panaggibus ti naituding nga aldaw ti registration. Awan koma dagita a dawat nga ekstension. Makaited laeng dagita iti saan a naannayas a panagtrabaho. Isturbo.

Ngem mapasamak latta ti maƱana habit ta kastay kunadan, nailasagen ni Pinoy daytoy nga aramid. Saannan a maikkat. Saannan a maiwagat.

Isu a naginad ti idadateng ti asenso wenno awan ti panagbalbaliw iti biag dagiti tattao. Ta maminsan laeng nga agtuktok ti opurtunidad ket no dimo inkaso wenno ginammatan, saanton nga agsubli pay iti kaano man. Ngem kadagiti manglislisi a kanayon iti maƱana habit, naasenso ken nalukay ti aangsanda iti daytoy nailet a lubong.#