TUNGTONG-ARUBAYAN: Ti Distrito a mabuangay tapno adda pagtugawan ni politiko. (Maudi a paset)

Uray ni Sen. Noynoy Aquino, agkitakit a mangpabor iti nasao a gakat agsipud ta saan a makaabut ti naisingasing a baro a distrito iti kasapulan a 250,000 a populasion a kas intuyang ti konstitusion.

Ita, daytoy ti mapapati a nakaigapuan ti saanda a panagkinnaawatan ken Sen. Joker Arroyo a maysa kadagiti pabor iti pannakabuangay iti sabali pay a distrito iti Camarines Sur.

Uray ita pay laeng, manamnaman ti pannakaiduron ti nasao a gakat tapno agbalin a linteg agsipud ta iti naudi a damag, addan sangapulo ket maysa a senador a mangpabor ket maysa laengen ti kasapulanna tapno maaprobaran.

Ditoy ti pakakitaan a bukod nga interes ti sumagmamano ti paratignay tapno mabuangay ti maysa a distrito tapno agbalin a pagrubbuatan ti anak ti Presidente.

Ditoy met ti pakakitaan nga agtignay dagiti agilinlintegtayo saan a para iti pagimbagan dagiti tattao no di ti pagsayaatanda ken dagiti padrinoda iti politika.

No taldiapantayo dagiti mangipagpagna iti pannakabuangay ti maikalima a distrito ti Camarines Sur, makitatayo a kaaliado ti agdama a liderato dagitoy. Dagitoy dagiti adda latta iti likudan ti Presidente, nangruna idi tiempo a nagunggon ti puestona gapu kadagiti alegasion ti panagsuitik iti eleksion idi 2004 ken dagiti anomalia a mapapati a nakaisawsawan dagiti dadakkel a tao iti gobierno.

Saan ngarud a namnamaen dagiti provincial officials ti Camarines Sur a denggen ida dagiti kaaliado ti Presidente a sisasagana a manglablab iti dakulapna tapno laeng magun-odda ti bendisionna nangruna ket umadanin ti eleksion a kasapulanda ti makinaria ti agdama nga administrasion. Iti agdama a mentalidad dagiti madaydayaw nga agilinlinteg iti Kamara, arig lumsot iti dagum ti isusupiat dagiti provincial officials tapno mangeg dagiti naselselan iti kapas a lapayag dagiti honorable a tattao a pakaiturongan ti isusupiatda.

Nakitatayon daytoy a mentalidad dagiti madaydayaw a agilinlinteg iti Kamara idi napilaan iti impeachment complaint ni Pres. Arroyo nga iti baet ti pakaasi dagiti nangipila ket pulos a di tinaliaw wenno dinengngeg dagitoy a kaaliado ti liderato ti agdama a gobierno. Nakitatayon ti klase dagiti agilinlintegtayo idi nadengngeg ti impeachment ni napadisi a Presidente Joseph Estrada nga iti baet iti napigsa a panangidagadag dagiti kameng ti oposision a malukatan ti enbelop a mapapati a naglaon iti bank account ti Presidente iti nagan ni Jose Velarde, saanda a naipangpangag ngem puonna metten ti panangpanawda iti Senate hearing a nagtungpal iti pannakaisayangkat dagiti protesta iti Edsa a nagtunged iti pannakapatapuak daytoy iti puestoda.

Kaanonto nga agbaliw ti klase dagiti agilinlintegtayo?

Agriingkayon, kailian!