TUNGTONG-ARUBAYAN: Ti Distrito a mabuangay tapno adda pagtugawan ni politiko. (Tuloyna)

Daytoy manamnama a panagbangga ti dua a napigsa a bileg iti masungad nga eleksion ti kangrunaan a gapu a pinutar ni Dip. Luis Villafuerte ti Bill 4246 a mangbuangay iti sabali manen a distrito iti Camarines Sur.

Addan a nakapending ti nasao a gakat iti committee on local government iti Senado a pagtsermanan ni Sen. Benigno Aquino III.

Awan koma ti problema iti daytoy a gakat ni Dip. Luis Villafuerte ngem anian ta nainget a kimmontra dagiti provincial officials nga indauluan ti anakna a ni Gov. Luis Raymond Villafuerte.

Nangidatag dagiti provincial officials ti Camarines Sur iti resolusion a naipatulod kadagiti amin a kameng ti Kamara ken iti Senado a mangsupiat iti nasao a gakat.

Segun iti resolusion dagiti agtuturay ti Camarines Sur, kontraenda ti gakat ni Dip. Villafuerte agsipud ta saanda a nakonsulta mainaig iti daytoy.

Kinuna dagiti provincial officials nga ipaneknek iti kalaka ti gakat a limsot iti Kamara ti “awanan panunot a panangipapilit’ dagiti proponente a maidurudor daytoy kadagiti umili ti Camarines Sur iti baet ti kakisang ti konsultasion kadagiti apektado nga stakeholders ken dagiti opisial a publiko.

Segun pay kadagiti agtuturay iti probinsia, maparalisa ti agdama nga umuna a distrito agsipud ta maisina manipud ditoy ti lima nga ili a pakaibilangan ti Libmanan, Pamplona, Pasacao, San Fernando, Minalabac ken dua nga ili, ti Milaor ken Gainza nga aggapu iti second district.

No maaprobaran ti gakat, agtungpalto laengen nga apagsurok a 175,000 ti populasion ti baro a first district.

Ngem no patien dagitoy a kaaliado ni Pres. Arroyo, dakkel ti pagsayaatan ti pannakabuangay ti sabali pay a distrito iti probinsiada. Kunada a malaksid iti ad-adu a pondo a maipan kadagiti distrito, ad-adu pay dagiti pagimbagan a maiburay iti probinsia agsipud ta limanton dagiti mangibagi a diputado ken siempre, babaen kadakuada, dumteng dagiti ad-adu a pondo para iti inprastruktura, pagadalan, salun-at ken dadduma pay a proyekto a mangital-o iti kabibiag dagiti agindeg.

Ngem iti pannakaiduronna nga awan man laeng ti konsultasion a naaramid kadagiti agnaed ken kadagiti provincial officials ti mangted iti dakes nga imahe kadagiti agilinlintegtayo.

Saan a maysa laeng nga alikamen wenno sanikua dagiti nadumaduma nga ili a pagparteparteanda lattan dagiti politiko tapno maakomodar laeng ti maysa a kaaliadoda kas paborda iti kangatuan nga apoda a politiko a nakatugaw iti trono a kasapulanda unay ti suportana tapno bumilegda iti puestoda ken agtalinaedda iti agdama a posisionda.

(Adda tuloyna)