TUNGTONG-ARUBAYAN: Ti Distrito a mabuangay tapno adda pagtugawan ni politiko.

Maysa a damag ti nakaawis iti imatangtayo itay nabiit: ti panangaprobar ti Senado a mabuangay ti sabali a distrito iti probinsia ti Camarines Sur. Mabalin nga adu ti saan a nangikankano iti nasao a damag iti kallabes ta adun dagiti gakat a naidatag iti Kamara ken iti Senado kas iti pannakaisina ti maysa a barangay tapno agbalin nga ili, ti pannakaisina dagiti sumagmamano nga ili tapno agbalin a probinsia wenno ti pannakabuangay ti maysa a separado a distrito tapno manayonan ti distrito iti maysa a probinsia.

Ngem kangrunaan a nakaawis iti imatangmi iti nasao a damag ti pannakabuangay ti separado a distrito tapno maakomodar laeng ti anak ni Presidente Gloria Arroyo, ni Diosdado, agdama a mangibagi iti umuna a distrito ti probinsia.

No patien ti damag, agdagupen iti sangapulo ket maysa a senador ti nangiyendorso iti nasao a gakat a mangbuangay iti sabali a district iti Camarines Sur tapno maakomodar ti anak ti Presidente iti baet ti isusupiat dagiti agtuturay iti probinsia a pakairamanan ni Gov. Luis Raymond Villafuerte, anak ni Dip. Luis Villafuerte.

Kas sagudayen ti nasao a gakat, buklen ti kabarbaro a 1st District dagiti ili ti Ragay, Del Gallego, Lupi, Sipocot ken Cabusao.

Buklen met dagiti ili ti Libmanan, Pamplona, Pasacao, San Fernando, Minalabac (aggapu iti dati a first district), Milaor ken Gainza (aggapu iti dati a second district) ti baro a maikadua a distrito.

Buklen ti Naga City, Canaman, Magarao, Bombon, Calabanga, Ocampo, Pili ken Bula ti baro a 3rd District.

Maretener ti komposision dagiti ili iti baro a fourth ken fifth districts.

Pito nga ili ti maisina iti agdinama a distrito a nakaikappenganda no maaprobaran daytoy a gakat, lima ti aggapu iti umuna a distrito ken dua manipud iti maikadua a distrito nga ibagian ni Dip. Villafuerte.

Madakamat ditoy a ni Dip. Diosdado Arroyo ti mangibagi iti umuna a distrito. Umuna pay laeng a termino ni Dip. Arroyo.

Ngem napigsa ti ispekulasion nga aglusulos ni Sekretario ti Budget Rolando Andaya, Jr. tapno agkandidato a diputado iti distritona inton 2010.

Maipalagip nga imbagi ni Andaya iti namitlo a daras ti umuna a distrito sakbay a timmipon iti Gabinete ni Pres. Arroyo. Sakbayna, imbagi ti amana ti distrito iti namitlo a daras.

Idi ni Andaya ti sekretario iti Budget, arig naiyawat ti umuna a distrito ken ni Dado nga anak ni Pres. Arroyo.

Ita, nagbalay ti diputado iti Libmanan, kapaliiwan a panagsaganana iti panagtarayna a diputado iti mabuangay a sabali a distrito ti probinsia.

Dagiti Andaya dagiti political kingpin iti umuna a distrito ket iti daytoy a planona nga agsubli iti politika, agbanggada la ketdi ken ni Dip. Arroyo iti distrito a baluartena!

(Adda tuloyna)