Ti panangiduron dagiti diputado nga asideg iti Presidente ti pannakabuangay ti sabali a distrito iti Camarines Sur tapno adda pagtugawan ti anakna ti nabatad a mangipaneknek a saan a ti pagimbagan dagiti tattao ti kangrunaan a kitkitaen dagiti agilinlinteg iti Kamara ken uray iti Senado no agpartuatda iti linteg no di tapno mapaboran ti bukodda nga interes, ti padada a politiko wenno nasinged a nabileg a tao. Daytoy ti makapaneknek a madadaan nga isakripisio dagiti diputado dagiti umili para iti bukodda a pagimbagan ken interes.
Nakakalkaldaang ngem kastoy ti klase dagiti imbaontayo iti pagpandayan-linteg a mangibagi kadatayo, kailian!
Ania ngarud ti namnamaentayo kadakuada iti tiempo a kasapulantayo ti tulong ken naan-anay nga imatangda kadagiti kangrunaan a problema ti ekonomia ken politikal a mangidagdagel iti pagiliantayo? Kasano koma ngarud nga italektayo kadakuada ti masakbayan ti pagiliantayo iti sanguanan ti agdadata a kaawan ti panangisakitda kadatayo ken madadaan a panangkugtarda kadatayo iti nakanganga a ngiwat dagiti buaya kas sakripisio tapno maikkat dagiti lapped iti managimbubukod nga interesda.
Adu ti mangsipsiput no matungpal ti panggep a mangbuangay iti maikalima a distrito iti Camarines Sur. Kas ti Camarines Norte, agur-uray met a mapagbalin a dua a distrito. Kasta met nga agsisiim ti Iloilo City ta adda nakapending a gakat a mamagkadua iti daytoy. Sabali laeng ti Cavite nga adda metten singasing a mabuangay iti tallo a distrito a pakairamanan ti Dasmariñas.
No maaprobaran ti pannakaisina ti maysa pay a distrito iti Camarines Sur, manamnama ti panagtudo a kasla uong dagiti mabuangay a distrito tapno adda pagrubbuatan dagiti politiko ken tapno mataginayon wenno napigpigsa pay ti kapetda iti teritorioda.
Kastoy ti napasamak iti panagadu dagiti ili a nagbalin a siudad uray no saanda a magun-od dagiti kasapulan ti maysa a siudad.
Ania ti napasamak? Iti maysa a pangngeddeng ti Korte Suprema, insublina dagiti 16 a kaudian a nagbalin a siudad iti dati nga estadoda a kas ili.
Ngem maitudo a yan ti basol dagiti agilinlintegtayo gapu ta sinalikawkawanda ti linteg tapno laeng agbalin a siudad ti maysa nga ili iti hurisdiksionda iti baet a saan pay a sisasagana nga agbalin a siudad.
Kastoy kadinto met ti mapasamak kadagiti distrito?
Daytoy ti masipsiputan no ania ti pagbanaganna!