Turismo iti San Esteban, mapapigsa

SAN ESTEBAN, Ilocos Sur – Manamnama a pumigsa ti turismo ditoy kalpasan a mapasimpa ti kalsada nga agturong iti Barangay Apatot ditoy nga ili.

Naammuan ken ni Apatot Barangay Captain Nestor Eligio a napunduan ti proyekto iti P20 milion babaen ti initiatibo ni Cong. Eric Owen Singson.

Babaen ti nasao a proyekto, mapalawa, masemento, ma-riprap ti kalsada a mangrugi iti Barangay San Nicolas nga agturong iti Barangay Apatot.

Nalataken ti Barangay Apatot a pagpallailangan dagiti turista gapu iti puraw a kadaratan ditoy  ken kaadda dagiti beach resort a pagdagusanda.#