Footer

Turista, barangay treasurer, biktima ti pannipdut, panagsibbarut

VIGAN CITY – Iti baet ti agresibo a programa ti city government a mangpadur-as iti turismo ditoy, adda latta dagiti manggundaway iti kinasangsangaili dagiti turista a mangperdi iti imahe daytoy a siudad.

Maysa a turista ken maysa a tesorera ti barangay ti biktima iti nagsaruno a pannipdut ken panagsibbarut ditoy siudad idi Septiembre 18 ken 17.

Nagpulong iti polis ni Erlinda Turingan y Cariño, 33, naasawaan, tesorera ti barangay, residente iti Barangay Sinabaan, Bantay, Ilocos Sur, a nagerret ti shoulder bagna ket intarayda ti walletna a naglaon iti kuarta ken napapateg a dokumento.

Iti panangisalaysay ni Turingan, nagturong iti tiendaan publiko iti bigat ti Septiembre 17 ket bayat ti kaaddana iti vegetable section, naduktalanna laengen a nagerret ti shoulder bagna ket sinikuat ti mannipdut ti walletna a naglaon iti P300 cash, 10 UK pounds ken 10 Scottish pounds ken dokdokumento a pakairamanan ti SSS ID, TIN ID, Postal ID, Barangay ID, resresibo ti deposito ti oxygen tank, ATM cards iti BDO, RCBC, Landbank, Sulit card iti Mercury Drug, ken Value Card iti JTC/St. Joseph Drugstore.

Di pay nabigbig ti mannipdut.

Kabayatanna, idi agarupd alas 8:40 ti rabii ti Septiembre 17, rinabsut ti maysa a lalaki ti digi-cam ti maysa a turista nga estudiante bayat ti pannagnada nga agkakaklasean iti Diego Silang Street, Barangay VI, ditoy siudad.

Iti pulongna iti polis, kinuna ni Remy Martin y Alagos, estudiante, residente iti Cayaoan, Camiling, Tarlac, mapanda koma aglangoy iti swimming pool iti El Juliana Hotel nga asideg laeng iti Villa Angela a nagtsek-inanda ket idi makadanonda iti main door ti nasao nga otel, kellaat a sinibbarut ti maysa a tao ti Canon digi-cam nga iggemna sa naglibas nga agpadaya.

Agpateg ti digi-cam iti P30,000.

Nangiwayat dagiti polis iti pursuit operation ngem saandan a nabirokan ti suspek.#