Turista a nangpalabas iti Paskua, Baro a Tawen iti Vigan, immadu

VIGAN CITY – Immadu dagiti turista a bimmisita ken nangrambak iti Paskua ken iti isasangbay ti baro a tawen ditoy a siudad.

Dagiti kalesaan ti maysa kadagiti dakkel a nabenepisiaran iti panagburnok dagiti turista iti Vigan agsipud ta dakdakkel ngem iti inanamada a matgedan ti nasapulanda iti Paskua ken Baro a Tawen.

Segun iti maysa a kutsero a dina kayat ti painaganan, nakatged pay iti nakurang a lima a ribu iti maysa laeng nga aldaw, banag a dina nasapulan iti napalabas.

Uray dagiti otel ket okupado dagiti kuartoda gapu iti kaadu dagiti turista a nangpalabas iti selebrasion ditoy siudad.

Iti immun-una nga interbiona iti media, kinuna ni Mayor Eva Marie S. Medina a manamnama ti yaadu dagiti turista nga umay iti Vigan kalpasan a napili daytoy a maysa iti New7Wonders Cities of the World.#