Ubbing, nagturayda iti Vigan City iti maysa nga aldaw

VIGAN CITY – Inturayan dagiti ubbing ti lokal a gobierno ditoy iti maysa nga aldaw idi Nobiembre 23 kas paset ti panangselebrar daytoy siudad iti Children’s Month.

Manipud iti mayor, bise mayor, konsehal, dadaulo dagiti departamento ken dabision a pakairamanan ti PNP, BFP ken BJMP.

Agdagup amin iti 43 dagiti agad-adal ditoy siudad ti nangsublat iti turay ditoy babaen met laeng iti pannarabay dagiti agtuturay.

Nagpaay a mayor ni Nina Paulette Agsaulo, estudiante ti Ilocos National High School, idinto a nagtakem a bise mayor ni Yvonne Louise Cuyo, agbasbasa iti Mindoro Elementary School.

Mamati ni Mayor Eva Marie S. Medina a babaen daytoy a gannuat, maisuro kadagiti ubbing ti nasayaat a panangimaton ti gobierno ket agbalinda a nasayaat a lider iti masakbayan.#