Ubbing nga agtawen iti dua, uppat, natay iti nagsina a pannakalmes

SANTA, Ilocos Sur – Maysa nga uppat ti tawenna nga ubingĀ  ubing ti naireport a nalmes iti kabaybayan a sakup ti Barangay Pasungol ditoy nga ili idi agarup 9:00 ti bigat ti Mayo 2.

Nainaganan ti biktima a ni Allysa Laurente y Dirije, residente iti nadakamat a lugar.

Naammuan iti inbestigasion a kadua ti biktima da Michael Marzan, 7, ken Mae-Mae Baldos, agpapada a lumugar iti nasao a barangay a nagdigos iti baybay iti dayta a bigat.

Segun iti report, nakita laengen dagiti dua nga addan ti biktima iti nauneg a paset ti baybay isu a nagpaarayatda kadagiti barangay officials a mangalaw kenkuana.

Naitaray ti biktima iti rural health office ditoy nga ili ngem indeklara ti doktor a bangkayen daytoyen.

Kabayatanna, immun-una ngem daytoy a pasamak, maysa met nga ubing nga agtawen iti dua ti nalmes idi Abril 28 iti Tapao Resort, Barangay Camanggaan, San Juan, Ilocos Sur.

Naammuan iti report a nalmes ni Justine Paul Molina y Villacillo, 2, ken residente iti Barangay Macatcatud, Magsingal, Ilocos Sur bayat ti maysa a pasken a naangay iti nasao a lugar.

Iti panagimbestiga dagiti polis, adda ti biktima iti swimming pool bayat ti ragragsak ket idi nakiddaw iti video recording, imbilin ti ina a nainaganan liti Liesel Molina y Villacillo a kitaen dagiti natataengan nga ubbing nga agdidigos iti swimming pool ti anakna sa napan nakigrupo.

Sumagmamano a minutos kalpasanna, nakita ti maysa a kameng ti pamilia ti bagi ti ubing a nairebreb iti uneg ti paglalangoyan ket dagusda nga inarayat a nakaduktalanda a ti biktima gayam ket nalmesen daytoy.

Intarayda ti ubing iti Pira Clinic and Hospital iti Cabugao, Ilocos Sur ngem indeklara ti doktor a natayen.#