Footer

Ubbog iti bubon, makaagas?

SALCEDO, Ilocos Sur – Makaagas ti ubbog manipud iti maysa a bubon a masarakan iti Barangay Pias ditoy nga ili?

Daytoy ti impetteng dagiti sumagmamano a nakainnuman ti DZTP ken Tawid News Magasin a mapapati a naagasan ti sakitda kalpasan ti yiinom wenno panagdigosda iti danum manipud iti nasao a bubon.

Naammuan toy reporter a manipud nagdinamag a makaagas iti nadumaduma a sagubanit iti bagi ti danum manipud iti bubon a masarakan iti Barangay Pias, ginasut dagiti tattao ti inaldaw a mapan sumakdo iti danum iti nasao a bubon.

Segun iti maysa a nakapatpatang ti nagsurat, idi damona, dagiti laeng agnaed iti barangay Pias, Maligcong ken Atabay ti sumaksakdo iti bubon ngem idi nagdinamag a makaagas ti danumna, uray dagiti agnaed iti kabangibang nga ili kas iti Santa Lucia, Galimuyod ken Candon ket mapanda metten sumakdo iti danum a pagdigos wenno inumenda.

Sumagmamano kadagiti nainterbio ti DZTP Radio Tirad Pass ken Tawid News ti nagkuna a talaga a makaagas ti danum manipud iti bubon.

Kinuna ti maysa a managan Jinky a naagasan ti gaddil dagiti ubbingna kalpasan ti sumagmamano a daras a  panagdigosda iti danum manipud iti bubon.  

Kinuna ni Manong Romeo a simmayaat ti panagisbona kalpasan ti yiinomna iti danum a sinakdona iti bubon.

Malaksid kadagitoy, adu pay dagiti di naidokumento nga addaan an-annayen a naagasan kalpasan nga imminomda wenno nagdigosda iti danum iti bubon.

Medio adayo manipud iti sentro ti barangay ti pagnaen tapno makadanonka iti nasao a bubon, ket malaksid a nalubnak ti dalan, adda pay dagiti karayan a lasaten, ngem umad-adu latta dagiti tattao a dumaydayo iti Barangay Pias.

Kinuna ti maysa nga agnaed  a nangrugi laeng a naglatak ti barangayda idi maysa a lakay a taga-Vigan City ti napan nangagas iti Salcedo.

Kinuna kano ti lakay a  makaagas ti nasao nga ubbog kadagiti nadumaduma a sagubanit ket namati dagiti lumugar idi madamagda dagiti naagasan a napan simmakdo iti bubon.

Kaadduan kadagiti agsaksakdo ti agaramat iti kuliglig a pangikargaanda iti ginalon a danum a sinakdoda iti bubon.#