Ubbog a pagtaudan iti mainom, naapgad: water district

MAGSINGAL, Ilocos Sur – Malaksid a nauneg ti ubbog iti immuna a nagkalianda, naapgad pay isu a sumapul ti water district iti sabali a pagtaudan ti inumen dagiti residente iti Metro Poblacion, kinuna ti municipal planning and development coordinator.

Kinuna ni Engineer Tiburcio Tabarrejo nga iti baet nga immabut iti 40 meters ti kauneg ti kinalida a pagtaudan ti ubbog, nakiddit ken naapgad ti danumna isu nga agbirokda iti sabali.

Iti Barangay Bacar ti nasurbey ti Magsingal Water District a pagkalianda iti ubbog a manamnama a pagtaudan iti nasayaat ti klasena nga inumen dagiti residente ditoy nga ili.

Madama ti instolasion dagiti tubo a kumamang kadagiti balbalay iti Metro Poblacion.

Napunduan iti P13 million daytoy a proyekto  manipud iti Local Utility Waterworks Administration idi ni Prospero Pichay ti administrador.#