Ubing, motorista, natay iti nagsina nga aksidente

MAGSINGAL, Ilocos Sur – Tallo manen a tattao a pakairamanan ti maysa nga ubing ti natay iti nagsina nga aksidente iti lugan a napasamak idi Enero 6 ken 8 iti Sta. Cruz ken ditoy nga ili.

Dead on arrival idi maidanon iti Magsingal District Hospital da Emil Argel y Valdez, 19, baro, ken residente iti Barangay Refaro, San Juan, Ilocos Sur ken ti inluganna a ni Randel Fernandez y Laciste, baro, ken residente iti Barangay Darao, San Juan  gapu kadagiti grabe a sinagrapda a sugat gapu iti pannakidinnungpar ti motorsikloda a Honda ARM iti MB 100 van iti national highway a sakup ti Barangay Bungro ditoy nga ili idi agarup alas 11:00 ti rabii ti Enero 8.

Naammuan iti inbestigasion dagiti polis nga agpaabagatan ti MB 100 Van a minaneho ni Claro Elmo Baptista y Santos, 53, baro, ken residente iti San Nicolas, Ilocos Norte idinto a makasabatna ti motorsiklo dagiti biktima ket iti panangliklik ni Baptista iti motorsiklo, mapapati a naawidna iti ti manibela iti makannawan ket kimmaut iti bangir a linia a nagresulta iti panagdinnungpar dagiti dua a lugan.

Saan a napakaruan ni Baptista ken ti inluganna a nainaganan Nomita Coloma, 53, naasawaan, ken residente iti Barangay 8, San Nicolas, Ilocos Norte, ngem naipanda met iti Magsingal District Hospital para iti pannakaagasda.

Naipan ti drayber iti police station ditoy para iti umisu a disposision kalpasan ti iruruarna iti ospital.

Kabayatanna, natay kalpasan ti sumagmamano nga orasna iti ospital ti ubing a dinungpar ti Besta Kia Van  iti national highway a sakup ti Barangay Gabur, Sta. Cruz, Ilocos Sur idi agarup 6:00 ti sardam ti Enero 6.

Saan a pulos a nakapuot ni Joseph Carbonnel y Manzano, Grade 3 pupil, ken residente iti nadakamat a barangay sipud naitaray iti Southern Ilocos Sur Capillariasis Center iti Tagudin, Ilocos Sur ken pannakaiyalisna iti Ilocos Regional Training and Medical Center iti San Fernando City ket naideklara a natay idi agarup 1:20 ti bigat ti Enero 7.

Kas panangipalawag ti drayber ti van, agdaldaliasat iti abagatan a direksion idi aksidente a madungparna ti ubing idi mapapati a bimmallasiw daytoy iti kalsada.

Nupay kasta, saanen nga agdarum pay ti ama ti biktima ta nagaregloda iti operator kalpasan nga inako daytoy nga isu ti mangibaklay amin dagiti nagastos iti ospital, pannakaitabon ken dadduma pay a nagbusbosan iti pannakaidalimanek ti biktima.#