Ubing, naireport a mapukpukaw

MAGSINGAL, Ilocos Sur – Maysa a pito ti tawenna nga ubing ti naireport a mapukpukaw sipud pay idi malem ti Disiembre 2.

Inreport ni Antonino Gutierrez y Vitales, 39, naasawaan, laborer, ken residente iti Sitio Rebba, Barangay Pagsanaan Norte, Magsingal, Ilocos Sur, iti police station ditoy a mapukpukaw sipud pay idi agarup 4:00 iti malem ti nadakamat nga aldaw ti anakna a ni Maica Gutierrez y Oliva.

Segun iti ama, rimmuar ni Maica iti balayda ket agmaymaysa a nagay-ayam iti paraanganda, idinto a napan nagtrabaho.

Idi nagsubli ni Antonino, naduktalanna nga awan ti anakna.

Nagpatulong ni Antonino kadagiti kabagian ken kaarrubada a nangsapul iti ubing ngem dida nabirokan isu nga inreportna iti kapolisan.

Nangipatulod ti polis ditoy iti flash alarm para iti pannakabirok ti ubing.#