Footer

Ubing, nalmes iti dike ti Govantes

VIGAN CITY – Maysa nga ubing ti nalmes iti dike ti Govantes iti Brgy. 1, Vigan City, Ilocos Sur idi malem ti Oktobre 30, 2018. Napasamak ti pannakalmes iti parte ti dike a masarakan iti likod ti Mart 1. Nainaganan ti biktima a ni Jamael Nor Ibrahim, 8, agnaed iti Zone 3, Bantay, Ilocos Sur.

Segun iti inisial nga inbestigasion, naggapu ti biktima ken ti kaduana a maysa pay nga ubing manipud iti Quirino Stadium. Nagna dagiti dua a nagturong iti igid ti Mestizo River tapno aglangoy ngem dita metten ti nakalmesan ti biktima.

Dagus nga insalakan dagiti kameng ti PDRRMC nga indaluluan ni Michael Chan ti ubing. Intarayda ti biktima iti Metro Vigan Cooperative Hospital, Bantay, Ilocos Sur ngem saanen a nakalasat daytoy ket natay met laeng idi agarup 7:00 iti dayta met laeng a rabii. (Tawid News Team)