Ubing, nalmes iti karayan

VINTAR, Ilocos Norte – Nalmes ti maysa nga ubing bayat ti panagdigosna iti karayan ditoy idi bigat ti Huebes, Mayo 9.

Saanen a naiyabut iti health center ti biag ni Ruby Mae Cabacungan, 7, residente iti Barangay 4 ditoy nga ili.

Segun iti report manipud iti polis ditoy, napan nagdidigos iti Bislak River dagiti agkakabsat nga Alma Cabacungan, 12, ni Bryan, 11, ken ti biktima iti nadakamat nga aldaw.

Mapapati a saan a nasiputan da Alma ken Bryan ti adida a napan naglangoylangoy ket nakitada laengen daytoy a malmalmes isu a nagpaarayatda iti amada.

Kalpasan nga inalaw ti ama ti biktima, intarayda iti kaasitgan a health center, ngem naideklara nga awanen ti biag ti ubing.#