Ubing, nalmes

SANTIAGO, Ilocos Sur.  Maysa a 9 anios nga ubing a lalaki ti nalmes iti panagdigosna iti baybay iti Barangay Mapisi Rock, Barangay Ambucao, iti daytoy nga ili.

Nainaganan ti biktima a ni Chester Mark Gabor, 9, Grade 4 pupil, ken residente iti Barangay San Nicolas, Candon City.

Iti inisial nga inbestigasion, naammuan a simmurot ti biktima kadagiti uliteg ken kabagianna idi napanda nagdigos iti baybay iti Ambucao. 

Idi mangaldawdan, binirok dagiti kaduana ti ubing ngem dida nakita iti ummong. Idi masarakanda, awanen ti biagna. (Danny Antalan)