Udi ti Barangay Nalasin iti water purifying station, linitupan ni Cong. Ryan

STO DOMINGO, Ilocos Sur – Linitupan ni Cong. Ryan Singson ti udi dagiti opisial ti Barangay Nalasin ditoy iti pannakagatang ti proyektoda a purified water station tapno saandan a problema pay ti itultulodda.

Kinuna ni Dip. Singson nga ita la a makakita iti kasta a proyekto iti barangay isu nga isun ti nanglitup iti utang ti barangay tapno naan-anayen a bukodda ti nasao a purified water station.

Kinuna ni Singson a nupay saan a napintas ti resulta ti butosna iti nasao a barangay, maysa a public servant ket madadaan a mangipaay iti tulong kadagiti proyekto a kas iti napanunot dagiti barangay officials ti Nalasin.

Nangted pay ti diputado iti pundo para iti pannakaipasdek ti pagaramidan iti ice cubes ditoy a barangay.

Segun ken ni Barangay Captain Tabangcura,  nakagatangdan iti motor a pagideliber kadagiti order a danum ta uray dagiti agnaed kadagiti kaparangetda a barangay ket umaydan aggatang iti purified water kadakuada.#