Umad-adu aglakbay-aral iti BArangay demo farm

SAN JUAN, Ilocos Sur – Segun iti mangimatmaton iti BaRangay demo farm ditoy nga ili,  umad-adu dagiti agpaspasiar iti demo farm tapno agobserbar wenno agadal.

Kinuna ni Dr. Cesar Soller a kaadduanna kadagitoy dagiti estudiante, farmers’ association ken NGOs tapno mapanda agpaliiw ken agadal maipapan iti panagpaadu iti dingnguen, fruit trees ken dadduma pay a pamastrekan mainaig iti agrikultura.

Kanaig daytoy, impakaammo ni Soller nga addan nasurok a dua a ribu a bamboo seedlings ti napatuboda iti demo farm, malaksid laeng dagiti mahogany ken grafted mango trees.

Naipasdek ti BaRangay demo farm kas paset ti programa ti gobierno probinsial a mangpadur-as iti agrikultura iti probinsia.#