Salaysay: Umad-adu dagiti deboto ni Apo Jesus Nazareno iti Quiapo | Tawid News Magazine - Weekly Ilocos News đŸ“°

Umad-adu dagiti deboto ni Apo Jesus Nazareno iti Quiapo

Black Nazarene procession

NAKASKASDAAW ti tinawen a yaadu dagiti dumardar-ay iti traslacion wenno prusision ti nangisit nga imahen ni Apo Jesus Nazareno nga insangpet dagiti Kastila a misionero iti Pilipinas manipud Mexico idi pay 1606, kabayatan iti Piesta iti Quiapo, Manila iti tunggal Enero 9.

Mabigbig ti Piesta iti Quiapo a kaaduan dagiti makipagpaspaset iti Pilipinas ta riniwriw dagiti makipaglilinnetlet kabayatan ti traslacion tapno makakapetda iti tali nga umamang iti andas wenno karosa a nakaikargaan ti imahe ni Apo Jesus Nazareno, wenno tapno makaulida ken maaprosanda ti nangisit nga imahe ni Apo Jesus a nagbaklay iti krus.

Iti napalabas a Piesta iti Quiapo ita a tawen, mapattapatta nga agarup lima a million dagiti nakikaysa iti traslacion ti imahen ni Apo Jesus Nazareno manipud Quirino Grandstand iti Rizal Park agingga iti simbaan iti Quiapo a nagpaut iti 21 nga oras.

Nabayagen nga adu dagiti deboto ken ni Apo Jesus Nazareno uray pay kadagiti naglabas a siglo, ngem nakaskasdaaw ti itatayok ti bilang dagiti makikaykaysa iti traslacion kalpasan ti milenio. Agtultuloy pay ti yaaduda gapu kadagiti napatganen dagiti kararag ken dawatda ti panagimbag iti nakaro a sakit wenno pannakagun-odda iti nasayaat a salun-at; ilulung-aw iti kinarigat ti panagbiag; ken nakappia a kasasaad ken dadduma pay a parabur ti Dios.

Naindaklan a panagsagana ti isaysayangkat ti gobierno ken pribado a sektor nangruna ti Simbaan Katolika. Tinawen a maikagkagumaan ket ti seguridad dagiti makipaset iti traslacion, ta saan laeng a dagiti deboto ti makikaykaysa iti dayta a pasken ngem uray pay dagiti sabali ken dakes ti panggepna. Mapagam-amkan ti pannakaisayangkat ti terorismo kas ti pannakapabettak ti bomba a posible a mangdangran kadagiti tattao. Sabali pay dagiti agtatakaw wenno mannipdut a manggundaway kadagiti tattao.

Personal a binayabay ni Director General Oscar Albayalde, Chief ti Philippine National Police, ti pannakaipakat ti nainget a seguridad iti Quiapo District kabayatan ti piesta. Indauluan met ni Director Guillermo Eleazar, dagiti 10,000 a kameng ti National National Region Police Office ken 2,000 nga augmentation dagiti support personnel manipud iti Armed Forces of the Philippines ken Philippine Coast Guard iti pannakatagiben iti urnos ken kappia iti rota ti traslacion a nagpaut manipud alas 5 iti parbangon ti Enero 9 agingga iti alas-dos iti sumaruno a parbangon. Nadardaras ti traslacion ita a tawen ngem itay 2018 gapu iti pannakaipababa ti rota a nagbalin laeng a 6.1 a kilometro.

Naideklarar a no fly zone iti batog ti Quiapo. Naiddep ti signal ti cellphone iti dayta a paset ti Manila tapno awan ti mausar a pang-triger iti bomba dagiti agplano a mangisayangkat iti terorismo. Naserraan dagiti adu a kalsada, ken nasuspender ti klase ken trabaho.

Kalaksidan ti posible a pananggundaway dagiti terorista ken kriminal iti Piesta ti Quiapo, napagam-amkan ti pannakadangran dagiti tattao a makipaset iti traslacion ta gapu ti panaglilinnetlet dagiti riniwriw nga agtarigagay a makaiggem iti tali ken makauli iti karosa ni Apo Jesus Nazareno ket tinawen nga adu dagiti nasugsugatan, ken adda pay dagiti natay iti naglabas a tawen. Dayta ti gapu a nakasagana dagiti medical personnel ken ambulansia nga agtignay no kasapulan iti serbisioda.

Iti laksid dagiti pangta ken peggad iti pannakikaysa iti traslacion iti Piesta ti Quiapo, umad-adu latta dagiti makikaykaysa iti daytoy a nakaskasdaaw a pasken. Dagiti parikut iti panagbiag ti gapu nga umad-adu dagiti deboto ken ni Apo Jesus Nazareno. Uma-adu dagiti desperado iti biag ket ni Apo Jesus Nazareno laeng ti nangipaay kadakuada iti namnama. Napaliiw nga umad-adu met dagiti nakikaykaysa iti traslacion a kayatda laeng a padasen wenno dagiti thrill seekers a kayatda a paneknekan ti kabaelanda.

Napeggad ti pannakipaset iti traslacion ti imahe Apo Jesus Nazareno ket rumbeng a dagiti laeng koma pudno a deboto ken nauneg ti pammatina ti makikaysa tapno mapagtalinaed ti kappia kabayatan ti Piesta.

Adda met dagiti deboto ni Apo Jesus Nazareno nga imbes a nakilinnetleda iti traslacion ket pinilida ti nagiwaras iti libre a taraon, mainum ken kuarta kadagiti padada a deboto.

Nakaskasdaaw a talaga ti tinawen a yaadu dagiti deboto ken ni Apo Jesus Nazareno iti laksid ti panagmodernon ti panawen ken wagas ti panagbiag dagiti Pilipino. Ipaneknek daytoy ti katibker ti debosion dagiti mamati iti ayat ken bileg ni Apo Jesus Nazareno. Iti laksid ti panangum-umsi ken pananglalais ni Presidente Rodrigo Duterte iti Dios dagiti Kristiano Katoliko, ket ipakita dagiti deboto ti kinatibker ti pammatida.

Mabigbig ti Pilipinas a pagilian dagiti Kristiano, kaaduanna ket Katoliko. No laeng koma maibiag dagiti kaaduan a Pilipino nangruna dagiti opisial ti gobierno ti pammatulad ni Apo Jesus Nazareno, awan wenno manmano laeng koman dagiti Pilipino nga agbalin a desperado, ken agbalin ti pagilian a naprogreso.