Umad-adu iti order iti sinelas a naaramid manipud water lily

CAOAYAN, Ilocos Sur – Umad-adu dagiti order kadagiti produkto a naaramid manipud iti waterlily, segun iti presidente ti Nansuagao Waterlily Handicrafts Association.

Kinuna ni Atinaja, presidente ti nasao a gunglo nga umad-adu dagiti agorder kadakuada iti sinelas a naaramid manipud iti waterlily a pakairamanan dagiti otel iti Vigan City ken iti Metro Manila.

Innayon ni Atinaja nga awan ti problema iti pagalaanda iti material nga aramidenda a sinelas, bag ken dadduma pay a gamit agsipud ta kaadu dagiti waterlily.

Initiatibo ni Mayor Germie Singson-Goulart ti pannakairusat ti panagaramid iti Nansuagao kadagiti sinelas, bag, ken dadduma pay a gamit manipud iti waterlily kas paset ti programana a one barangay one product tapno maitag-ay dagiti produkto daytoy barangay a mangipaay iti panggedan kadagiti residente.#