Umad-adu kontra kontribusion iti barangay, SK elections

CAOAYAN, Ilocos Sur – Umad-adu ti bilang dagiti barangay captains a mangsupiat iti kidkiddawen ti Commission on Elections a panagkontribusionda para iti maangay a barangay elections.

Itay lawasna, impeksa ti grupo dagiti konsehal ditoy nga ili nga idadauluan ni ABC President Teresa Alquiza ti isusupiatda iti  kiddaw ti Comelec a panangilatangda iti P10,000 para iti pannakaisayangkat ti eleksion dagiti barangay officials inton Oktubre 28.

“Napag-aanamonganmi a saankami a mangted,” kinuna ni Alquiza sana innayon nga agkurkurang ti pondo dagiti barangay ket saan pay a makaumanay a gastuenda para kadagiti proyekto iti lugarda.

Segun ken ni Alquiza, saan a mandatory ti panagitedda iti P10,000.00.

Kas panangipamatmatda iti takderda, nangipasa ti Liga ng Barangay iti maysa a resolusion a nangibatadanda iti isusupiatda iti nasao a kiddaw ti Comelec nga indatagda iti opisina ti poll body iti probinsia tapno maipatulod ken ni Comelec Chairman Sixto Brillantes.#