Footer

Umad-adu nga aksidente iti Sta. Lucia, inaksionan ti konseho

STA. LUCIA, Ilocos Sur –
Nagtignay ti sangguniang bayan ditoy nga ili tapno malapdan dagiti
aksidente a pakainbolbaran dagiti ubbing nga agmaneho iti lugan
nangruna iti motorsiklo.







Inyussuat ti konseho daytoy nga
addang maigapu iti nagsasaruno a napasamak nga aksidente ditoy a
nakatayan ken nakasugsugatan dagiti nagmaneho iti motorsiklo a menor
de edad.

Iti regular a session a
naisayangkat itay nabiit, babaen ti panag-preside ni Vice Mayor
Estrella Hernaez, inkalikagum dagiti kameng ti sangguniang bayan
ditoy ti panakaputar dagiti resolusion a mangkontrol kadagiti ubbing
iti panagmotorsikloda.

Pakairamanan ditoy ti
panagaramidda iti resolusion a maiturong kadagiti prinsipal wenno
head teacher iti elementaria ken sekundaria tapno di mapalubosan
dagiti estudianteda nga agmotor no mapanda agbasa.

Disiplinaan
koma dagiti nagannak dagiti annakda nangruna iti panagmaneho iti
lugan ket no mabalin, dida pay palubosan dagitoy nga agmaneho,”
kinuna dagiti konsehal.

Inramanda pay ti pannakabukel iti
resolusion a maiturong iti Land Transportation Office tapno
mang-deputizeda iti maysa wenno dua a polis nga agtiliw kadagiti
menor de edad nga agmanmaneho.

Sabali pay ti resolusion a
panangiparit iti drag racing iti kalsada a masaksakupan daytoy nga
ili.

Kinuna ti maysa a konsehal nga adu
dagiti mapasamak nga aksidente a nakainbolbaran dagiti menor de edad
gapu ta awan ti ania a pannakaammoda kadagiti paglintegan iti
trapiko.

Innayonna a maysa pay a rason ti
panagadu ti aksidente iti yaadu dagiti motorsiklo nga agtaray
kadagiti kalsada agsipud ta nalaka itan ti mangiruar iti motorsiklo
babaen dagiti special package promo dagiti aglaklako iti motorsiklo.

Kabayatanna, maysa ti natay idinto
a nasugatan ti dua iti sabali pay nga aksidente a nakainbolbaran ti
motorsiklo ken maysa a traysikel.

Natay ni Benjamin Habon, Jr. 15,
residente iti Barangay Cabaritan ditoy idinto a nasugatan ni
manongna a ni Leonard Habon, 17, ken ni Ronel Soliman, 22 ,
taga-Palina, Kibungan, Benguet nga aggigian iti Man-atong, Suyo,
Ilocos Sur.

Segun iti inbestigasion, ni
Benjamin ti nagmaneho iti RS 100 ket insakayna ti manongna a ni Ronel
idi nakidinnungpar ti luganda iti traysikel a minaneho ni Soliman.

Naitaray dagiti agkabsat iti
Candon City Hospital ngem natay bayat ti pannakatamingna ni Benjamin.

Naitaray met iti Santa Lucia
District Hospital ni Soliman.#