Footer

Umad-adu reklamo maikontra kadagiti agpaspasada iti traysikel

VIGAN CITY  – Umad-adu ti bilang dagiti maidatdatag a reklamo kontra kadagiti agpaspasada iti traysikel ditoy.

Daytoy ti limtuad iti dialogo iti nagbaetan ti riding public ken dagiti operators ken drayber ti traysikel nga inangay ti komite ti transportasion ti Sangguniang Panlungsod ditoy a pakaigapuan iti pannakaangay ti tricycle summit iti maikatlo a lawas ti Septiembre.

Kinuna ni City Councilor Everin Molina, chairman iti committee on transportation, a naisingasing ti pannakaangay ti nasao a summit agsipud iti adu a reklamo ti riding public maikontra kadagiti traysikelan iti Metro Vigan.

Kinunana a matratar dagiti problema a pakaseknan ti traysikelan iti Metro Vigan ken iti riding public tapno maaksionan ti city government.

Kinunana a kas maibasar kadagiti umad-adu a reklamo ti riding public, nalipatanen dagiti tricycle operators ken drivers ti obligasionda iti publiko kas nailanad iti prangkisada.

Kaadduan a reklamo dagiti pasahero ti kinangina ti singir a plete dagiti agpaspasada a nanginngina ngem iti naituding a plete, kinabastos dagitoy iti pasaheroda, panagpilida iti iluganda aglalo no rush hour, ken dadduma pay a panaglabsing.

Kanaig daytoy, improponer ti komite a maikkan iti complaint form dagiti nakaduty a traffic enforcers tapno nalaklaka dagiti pasahero iti mangidatag ti reklamoda.

Nupay kasta, saan laeng a ti pannakadisiplina dagiti aglabsing nga operators ken drivers ti matratar iti summit no di pay iti pannakapadayaw dagiti agpaspasada iti traysikel a nakaaramid iti nasayaat para iti komunidad.

Manamnama nga umatendar iti nasao a summit a maangay iti  Vigan Culture and Trade Center dagiti aganay 3,500 nga agpaspasada iti Metro Vigan agraman dagiti operators ken opisial ti gungloda,  ti riding public,  dagiti non-government organizations, student councils, parent-teacher community associations, ken dagiti kameng ti media. (Jane Ballad)