Umadu manen agsakit iti dengue

VIGAN CITY – Umadu manen dagiti agsakit iti dengue iti nadumaduma nga ili ditoy probinsia kalpasan ti panagtudtudona itay nabiit.

Iti maudi a lawas ti Septiembre, adu manen dagiti agsakit iti dengue a naiserrek iti Gabriela Silang General Hospital.

Segun iti rekord daytoy nga ospital, kaadduan ti bilang dagiti nagsakit iti dengue ti Vigan City a nagdagup iti 10; maikadua ti Bantay (8 a kaso); sumaruno ti Caoayan (5), San Vicente ken Santa (sag-2); ken Sto. Domingo (1).

Kadagiti nagsakit iti dengue, napaliiw a kaaduan ti aggigian iti maymaysa a balay idinto a dagiti sabali, adda nagsakit iti dengue iti lugarda.

Agtaud ti sakit a dengue manipud iti kagat ti maysa a klase ti lamok.

Kanaig daytoy, idagdagadag dagiti health authorities ti panagdaldalus iti arubayan ken panagipattog kadagiti amin a posible a pagurnongan ti danum tapno awan ti pagitlogan ken pagumokan dagiti lamok.#