Umagibas a pampanunot bayat ti bayakabak (Maudi a paset)

Umanayen ti nasam-it nga isemda a katukad ti lektiurko, Atanud. Atiwek dagiti titser a ti la sueldoda ti napateg, Atanud? Ay, dika man ta didatanto ket pagsaoan nga awan ti utangta a naimbag a nakem kadakuada.

Laglagipem a naglabasta met kadagiti mannursuro. Saan a rumbeng a langsotenta ida.

Ngem naibagam metten ti komentom, Atanud. Makaammo ditan, a!

Sublianta dagiti mulami, Atanud. Saanmo a pagdanagan ta awan ti mangasak a dinguen. Dagiti tarakenmi, nakaipanda iti maysa a paset ti bangkag. Didanto makatalaw ta nalagda ‘diay kulonganda.

Dimo met rumbeng a pagdanagan dagiti dinguen dagiti kaarrubami, Atanud. Awan pulos uray maysa la koma nga aggudgod nga aso wenno kalding. Dida masango. Napatpateg ti panagpinggitda iti innipis.

Maanusanda, ‘ya, ti agtaraken iti ayup. Dida payen maasikaso dagiti annakda, daytanto la ketdin dinguen?

Sakbay gayam a makagtengka ditoy pagtaenganmi, Atanud, malabsanto ti maysa a nakaar-ariwawa a pasdek. Videokean dayta ni kapitan. Napigsa daytoy a pamastrekanna.

Ngem napigsa ti sayangguseng nga iti rabii, adu kan’ dagiti panniki nga agruruar iti bideokean, Atanud. Agnegosion sa metten iti guano ni kapitan, kunkunak man! Organiko a ganagan, napintas iti daga tapno di madadael ti komposisionna!

Ne, apay a katawaannak, Atanud? Nayanakak idi panawen ti ud-udong? Dika maawatan.

Ngem dimo koma ibagbaga iti sabali daytoy a nalabidko kenka. Diak kayat ti maibarangay, Atanud. Baka diak makapagpasensia ket adda marubirobko a kapitan.

Inton addakan ditoy balay, pasanguankanto iti kapkapnekam a makan, Atanud: liningta a saba, tinuno a dalag, pinakbet ken agburarogka iti digo ti kalog ti gulimba a niog ni Tatang.

Wen gayam, Atanud, adda bassit a kantina ti kabsatko. Pasaray siak ti aglako ta di met agpakatalna ti aguppat ti tawenna a kaanakak. Adda ni lakayna idiay ballasiw-taaw. Mayat-a-makapasuron ti aglako. Mayat ta awan ti kakompetensia. Uray kaskasano, dakkel ti maitultulongna a panggatas iti kaanakak. Makapasuron met ta uray panawen ti pannangan no adda aggatang/gumatang, kapilitan a takderam tapno mapanka aglako.

Makapasuron pay ta no kastoy a bumayakabak a panawenko a mangpampanunot iti suratek a salaysay wenno sarita a pagsarmingam, Atanud, no bilang makalusot ken ni Apo Editor, isu met ti yaawag dagiti gumatang. Ania pay, lumiasen ti pingpinggiten (saan nga innipis, wen?) ti isipko. Isu a pasensiaannak la koman no ita laeng nga agmata ‘toy salaysayko.

Agyamanta kadaytoy bayakabak ta napigsa bassit ket masulit pay la siguro dagiti umay aggatang wenno addada pay laeng kadagiti balbalay a paksolda (wen, Atanud, saan laeng nga ig-igid ti alad ti yanda) isu a naileppasko met laeng daytoy basbasaem ita.

Makapasuron pay ti aglako, Atanud, gapu kadagitoy nga er-er. Makasukmonda ngem piman ta dida pay maigatangan iti uray dulsi laeng koma dagiti ipusda (dagiti annakda). Kasta met dagiti managpayubyob.

Pakabasbasolak payen, Atanud, ta idawdawatko no maminsan a maidaramudomda koma no kasta nga agbasingbasingda nga agawid.

Ibagbagak iti kabsatko nga isardengnan ti aglako iti arak ken sigarilio ta matulonganna met dagiti ubbing. Ngem irasonna met nga isu kan’ met laeng a panglikkabanna bassit (ta mano laengen, aya, ti maganansiana kadagiti saramsam?) a pangsupusopna iti makapa-high blood a paglisensia nga inyetnag ni kapitan!

Wen, pakairanudam met ti bayakabak, Atanud.

Saanka met a mannurat tapno panawenmo koma met nga agsurat, Atanud? Ay, ket, agmulaka iti kamotit a mula ti sadut, a! Wenno ania man a nateng ken prutas. Ta di laeng dayta agdadawat (wenno mangsibsiblok?) ken ‘ta kaarrubam.

Awan ti maimulam? Isu ngarud nga aw-awisenka ditoy balay ta ikkanka iti pangrugiam, Atanud. Bareng maparamanamto met dagita ubbing a kaarrubam, Atanud. Umanayen dayta a pangsubadmo kaniak.#