Banner News: Umno a panagaramat iti lenguahe nga Ilokano, inyadal ti GUMIL sadiay UNP | Tawid News Magazine - Weekly Ilocos News 📰

Umno a panagaramat iti lenguahe nga Ilokano, inyadal ti GUMIL sadiay UNP

VIGAN CITY — ADU dagiti agsursurat ken agsasao iti Ilokano, ngem adu dagiti biddutda ta saan a mayanatup iti umno nga ortograpia ket rumbeng a maisuroda tapno agdur-as pay ti kangrunaan a lenguahe dagiti umili iti Amianan a Luzon.

Dayta ti panggep ti naangay a nagmalem nga “Innadal” nga insayangkat ti Gunglo dagiti Mannurat nga Ilokano (GUMIL) iti Pilipinas ken Ilocos Sur sadiay Tadena Hall iti University of Northern Philippines iti daytoy a siudad idi Pebrero 21, 2020.

Sinangaili da Gumil Filipinas President ken Apayao Vice Governor Remy Albano, ken Gumil Ilocos Sur President Benjamin Pacris dagiti nasurok a 150 a delegado a pakairamanan dagiti mannurat, kameng ti print and broadcast media, miembro ti Philippine National Police, mangisursuro ken mass communication students.

Nasangaili met da UNP President Erwin Cadorna, ken 1st District Representative Deogracias Victor Savellano. Nangipaayda iti nabagas a mensahe a nangparegta kadagiti delegado tapno itultuloyda a padur-asen ti lenguahe nga Ilokano tapno mataginayon agingga kadagiti sumaruno a henerasion.

Nangipaay ti lecture iti Ilokano Ortography ni Mr. Clesencio Rambaud, Managing Editor ti magasin a Bannawag a maibilang a pannakabiblia dagiti Ilokano. Inyadalna dagiti umno a panagaramat ti ortograpia kas mayataday iti “Tarabay” nga inaprobaran ti Commission on Filipino Language. Insurona ti umno a panagusar kadagiti balikas nga “a” ken “nga”, ken panagaramat iti “ti” ken “iti.” Inyadalna pay dagiti umno a panagaramat iti “plural form” dagiti banag, ken umno nga ispeling.

Naglektiur iti umno a panagipatarus iti Ilokano (Translation) ni Mr. Joel Manuel, Prinsipal iti pagadalan iti Department of Education iti Ilocos Norte ken premiado a mannurat a nagadal iti Linguistics iti University of the Philippines. Inyadalna ti umno a panagipatarus iti Ilokano tapno saan a mapukaw wenno mayaw-awan ti kaipapanan ti maisurat wenno maisarita.

Imburay met  da Mr. Pacris, retirado a manager ti Philippine Information Agency iti Ilocos Sur  ken Mr. Eliseo Contillo, sigud a News Editor ti Bannawag ken radio announcer, dagiti nabaknang a padasda iti print and broadcast media, ken insingasingda dagiti rumbeng a mapadur-as kas ti panagsuratan iti napintas a “lead” iti damag, ken dagiti umno a pannakaaramat dagiti balikas nga Ilokano tapno nalawag ken kompleto dagiti aramidenda a damag.

Nangiburay met dagiti print and broadcast media practitioners kadagiti padas ken singasingda tapno ad-adda pay a mapasayaat ti panagusar ti lenguahe nga Ilokano kadagiti damag iti radio, telebision wenno pagiwarnak.

Naballigi a naisayangkat ti nagmalem a libre nga “Innadal” babaen ti suporta ti Provincial Government of Ilocos Sur iti liderato ni Governor Ryan Luis Singson, UNP Office of the President ken ti Center for Ilocano Studies and Museum. ●