Umno la unay no awan maiparbeng

Kada umuna nga aldaw ti Setiembre iti tunggal tawen a mapasamak ti panangawat dagiti nangabak iti nadumaduma a pasalip ti Palanca Awards. Maika-61st a tawenen daytoy maysa kadagiti kalatakan nga agpaspasalip iti literatura ditoy pagilian. Nalaklakay pay nga adayo ngem datao. Uray idi saan pay laeng datao a mannurat ket inur-uraykon ti iruruar dagiti nangabak babaen kadagiti pagiwarnak ken magasin.

Itoy a tawen, naulit manen ti saan a pannakaragpat dagiti nakisalip iti “Maikling Kuwento” banag a kinutina met dagiti kiday – apagapaman met ketdi a. Awan ti nakapatar iti pagrukodan dagiti hurado. Awan ti nangabak iti umuna ken maikadua a gunggona. Ti laeng maikatlo a gunggona ti naikari, ti sarita a “Metro Gwapo” ni Michael S. Bernaldez. Uray ti One Act Play ket napasamak met, ngem kabaliktadna – ti umuna a gunggona ti adda nangabak ngem awan naikari iti maikadua ken maikatlo a gunggona.

Saan met ketdi a daytoy laeng a gundaway a napasamak daytoy ta adda met kastoyen iti kallabes. Iti kapanunotanmi, umno la unay daytoy no awan ti maiparbeng. No awan ti nakapatar iti naikeddeng a pagrukodan, apay ketdin nga ited no saan a maiparbeng?

(Uray iti Iluko, napasamak met daytoy iti RFAAFIL, a maymaysa laeng ti nangabak.)

Rumbeng la unay a suroten dagiti maitutop nga allagaden kadagiti pasalip tapno magun-odan ti kapkapnekan a kalidad dagiti sinurat. Saan a komo adda gunggona, ited metten daytoy uray awan nakapatar iti kalidad. (Kas maysa kadagiti naghurhurado kadagiti pasalip, diak ipaay ti gunggona no patiek a di maiparbeng.)

Iti biang ti salip ti Maikling Kuwento, paboritok a mannurat dagiti naghurado, da Ms. Lualhati T. Bautista – Chairperson, Dr. Fanny A. Garcia, Dr. Jimmuel C. Naval – dagiti nalalatak a persona iti Phil. lit. Maysa kadagiti paboritok a  nobelista ni Lualhati Bautista, iti man literatura ken iti komiks. Nakallalagip dagiti sinuratna a ‘Gapo’, ‘Bata, Bata, Paano Ka Ginawa,’ ‘Dekada ‘70’ ken dadduma pay. Ngem ad-adda a nakallalagip kaniak ti saritana a “Lorena” ta naiduma pay ti pannakaisuratna, ta maysa a dramatic monologue. (Tratarentayonto daytoy iti masungad).

Ni Dr. Fanny Garcia, ti sabali pay a babai a mannurat nga intay pagtamdagan la unay. Maysa a Filipino teacher, fictionist, essayist, scriptwriter, editor, researcher, translator. Nakallalagip la unay ken kulditenna ti puso asinoman a mangipatpateg la unay iti anakna, lalo no daytoy ket Special Child nga addaan iti sakit nga autism, ti sinuratna a “Erick Slumbook” (Ang Paglalakbay Kasama Ang Anak Kong Autistic).

Ni Dr. Jimmuel C. Naval, nalaing a mannurat iti salaysay ken fiction. Ket itay laeng Hunio 25, maysa kadagiti uppat a pulo nga immawat iti University of the Philippines Alumni Association (UPAA) iti UP General Alumni-Faculty Homecoming. Immawat iti benneg ti culture and the arts. (Kaduana ditoy nga immawat ni Ilocos Sur Vice Governor Deogracias Victor B. Savellano nga immawat met iti benneg iti good governance.)

Dagitoy dagiti naghurado. Mamatikami unay nga umno ti inaramidda a saan a panangited iti pammadayaw no awan ti maiparbeng nga umawat ken saan a nakapatar iti kalidad ti sinurat. Isuda a tallo ket nangab-abakda metten iti pasalip ti Carlos Palanca Awards.

Iti biang ti Iluko, indauluan ni Ariel Tabag dagiti nangabak, babaen ti saritana a “Saddam”; maikadua a gunggona ti sarita ni Juan A. Asuncion nga “Ayuno”; ti sarita a “Ti Agdamdamili” ni Norberto D. Bumanglag ti immawat ti maikatlo a gunggona.

Eksakto a sangapulo ket liman a tawen ti Iluko ti Palanca Awards. Naluktan daytoy idi 1997 a kaduana ti Cebuano ken Hiligaynon. Addaanen iti duapulo ket dua a nangabak. Sangapulo dagiti nangabak iti 1st Prize, Ricarte A. Agnes (2 a 1st), Jaime M. Agpalo, Jr. (1), Danilo B. Antalan (3), Sherma E. Benosa (1), Prescillano N. Bermudez (1), Noli S. Dumlao (1), Reynaldo A. Duque (3), Bernardo D. Tabbada (1), ken Lorenzo G. Tabin (1) ken Ariel Tabag.#