Umuna a 7 bulan: 886 wanted persons inaresto ti Region I police

CAMP BGEN OSCAR M. FLORENDO, SAN FERNANDO CITY, La Union – Agdagup iti 886 dagiti wanted persons nga inaresto dagiti polis ditoy Region I iti umuna a pito a bulan daytoy a tawen, daytoy ti data manipud iti Regional Intelligence Division ti Police Regional Office 1 ditoy.

Iti kadagupan dagiti wanted a tattao, 874 ti naklasipika a Wanted Persons nga awan ti naituon a gunggona iti makatiliw kadakuada, segun iti RID. Ti Pangasinan PPO ti kaadduan ti natiliw a wanted persons nga agdagup iti 469; simmaruno ti La Union PPO (192), Ilocos Sur PPO (150) ken Ilocos Norte (63).

Naklasipika a Most Wanted Persons (MVPs) dagiti nabati a 12, maysa ti nakalista iti national level idinto nga 11 ti nakalista iti provincial level. Adda naitanggaya a gunggona iti asinoman a makatulong iti pannakatiliw dagitoy.

Idi Agosto 7 daytoy a tawen, natiliw iti barangay Maab-abaca, Piddig, Ilocos Norte babaen dagiti otoridad ti PRO1 ni Nicanor Borromeo y Andres, naklasipika a National Level nga MWP. Wanted iti linteg ni Borromeo gapu kadagiti krimen a murder, arson ken robbery, ket addaan iti P1.05 milion a gunggona para iti pannakatiliwna.

Kabayatanna, natnag iti ima dagiti polis itay nabiit ti maysa a miembro ti notorious gang a nainbolbar iti gun running, gun for hire ken ekstorsion .

Tiniliw dagiti nagtipon nga elemento ti Ilocos Sur Criminal Investigation and Detection Team (CIDT) ken Bangar Police Station ni Edwin Maynes y Munio, miembro iti Maala Group, grupo a kriminal a nainbolbar kadagiti gun running, gun-for-hire ken extortion activities iti Ilocos Sur ken  La Union iti Shoemart North EDSA, Quezon City idi Septiembre 19.

Nairaman ni Maynes iti listaan ti PRO1 a Most Wanted Persons (MPW) nga addaan iti P140,000 para iti pannakatiliwna. Nakalista pay iti La Union kas Provincial top MWP.

Naaresto ni Maynes babaen ti bileg ti warrant of arrest nga inyisio ni Judge Manuel R. Aquino ti Regional Trial Court  Branch 34, Balaoan, La Union. Wanted ni Maynes gapu iti kaso a murder a pinadagsen ti panagusar iti awan lisensiana a paltog ket naka-docket daytoy iti babaen ti Criminal Case No. 3494 nga awan ti nairekomenda a bailbond.

Itay nabiit, imbilin ni Police Chief Supt. Franklin Jesus B. Bucayu, PRO1 regional director, kadagiti nadumaduma a unit ken opisina iti babaen ti komandansiana ti naing-inget nga operasion maikontra kadagiti wanted a tattao.

“Bayat nga intultuloytayo daytoy a kampania, ad-adda pay nga ipingettayo kas panagtungpal iti 10-Point Action Plan ni Police Director General Nicanor A. Bartolome, ti kabarbaro a hepe ti PNP, partikular ti pannakaaresto dagiti wanted a tattao,” kinuna ni Bucayu.

“Ipamaysatayo ti panangipatungpal kadagiti warrants ket ekspektarentayo ti ad-adu pay a maaresto a wanted a tattao kadagiti masanguanan nga aldaw, innayon ti regional director.#