Umuna a nagsakit iti dengue, nailista

VIGAN CITY – Nakaalerto ita dagiti mangimatmaton ti salun-at ditoy probinsia iti pangta ti sakit a dengue ita a tawen kalpasan nga adda nairekord nga umuna a nagsakit iti dengue itay nabiit.

Kumpirmado a dengue ti sakit ti maysa a di nainaganan a residente iti Barangay Rugsuanan ditoy a naipadoktor idi baro a tawen kalpasan nga agsubli-agpukaw ti gurigor daytoy.

Inyunay-unay ti maysa a mangimatmaton iti salun-at ditoy ti panagdaldalus dagiti agindeg iti siudad ken iti panagipattogda kadagiti amin a pagurnongan iti danum a pagumokan ken pagitlogan dagiti lamok.

Kinunana pay a mangisayangkat manen ti city health office iti fumigation tapno mapaksiat dagiti lamok.

Idi napan a tawen, maysa daytoy siudad kadagiti nagrairaan ti sakit a dengue.#