VIGAN CITY – Presente amin dagiti provincial board members iti umuna a sessionda a naangay iti session hall ti provincial capitol ditoy itay Hulio 3.

Inangay ti Sangguniang Panlalawigan babaen ti panagpaay ni Vice Governor Jeremias “Jerry” Singson a presiding officer ti umuna session a presente amin dagiti  provincial board members a pakairamanan da Bokal Ismael Baterina, Azucena Purisima, Ronnie Rapanut, Orlino Tesoro ken Gerardo Lahoz iti umuna a distrito; da Bokal Zuriel Zaragoza, Jose Bonuan, Robert Tudayan, Peter Manzano, ken Rosario Gironella iti maikadua a distrito.

Presente met iti session da ABC Federated President Ponciano Bagbagen ken SK Federated President Mhel John Verzosa.  

Immuna a trinatar ti provincial board ti Internal Rules of Procedure (IRP)  a nakaamendaran ken nakaadaptaran iti sumagmamano a probision kas ti pannakairaman  ti committee on illegal drugs ken ti panagbaliw ti skediul  ti panagsession.

Napag-aanamongan a maangay ti session, saanen a tunggal Martes no di iti alas 2:30 iti malem ti Mierkoles.

Nadaras a napili dagiti chairman agsipud ta awan ti nangkontra kadagiti naisingasing a mangidaulo kadagiti 23 a nadumaduma a  komite.

Dagiti sumaganad dagiti nadumaduma a komite ken dagiti chairmanda:

Rules ken Blue Ribbon – Bokal Orlino Tesoro;  

Peace and Order, ken Infrastracture – Bokal Zuriel Zaragoza;

Youth and Sports ken Illegal Drugs – SK Fed. Pres. Mhel John Verzosa;

Health and Sanitation ken  Social Services –  Bokal Gerardo Lahoz;

Tourism ken Finance and Approriation –  Bokal Azucena Purisima;  

Women ken Indigenous Affairs – Bokal Rosario Gironella;

Agriculture ken Labor and Employment – Bokal Ismael Baterina;  

Environment ken Agriculture (co-chairman) – Bokal Robert Tudayan;

Cooperatives ken Education – Bokal Jose Bunoan Jr.;

Ways and Means ken Trade and Industry – Bokal Peter Manzano;  

Information and Media Affairs, co-chairman, Education ken Justice and Human Rights – Bokal Ronnie Rapanut;

Barangay Affairs –  ABC Fed. Pres. Ponciano Bagbagen;

Municipal Affairs – PCL Pres. Alfonso Singson.

Idi damo a panagtakem ni Rapanut a bokal (oposision), awan ti nagtsermananna a komite ngem ita isu ti kaaduan ti pagtsermanan.

Saan la a puro trabaho ti inatupag dagiti bokal iti damo a panagsessionda.

Rinay-aw ni Bokal Tesoro dagiti kabaddungalanna babaen ti panangipatayabna iti maysa a daniw a nanglagipanna iti mensahena idi napalabas nga eleksion.#