Umuna a tallo nga aldaw ti baro a tawen: 3 natay iti aksidente ti lugan

SAN ILDEFONSO, Ilocos Sur – Tallo ti natay idinto a tallo met ti nasugatan iti aksidente a nakainbolbaran dagiti lugan a napasamak iti umuna a tallo nga aldaw daytoy a tawen.

Natay da Jumar Tuzon y Tabaco, 26, naasawaan ken residente iti Barangay Pussuac, Sto. Domingo ken ti insakayna a ni Robert Campus, residente iti Barangay Puerta Real, Sto. Domingo kalpasan a nakidinnungpar ti Honda TMX 155 a motorsikloda iti Nissan Patrol a minaneho ni Ateneo Tabbada y Tiron, 36, baro, negosiante, ken residente iti Barangay Pangpangdan iti national highway a sakup ti Barangay Poblacion East, ditoy nga ili idi agarup 5:10 ti malem ti Enero 3.

Iti inisial nga inbestigasion ti polis, mapapati a napaspas ti taray dagiti dua a lugan isu a napatengngada iti kalsada a puon ti panagdinnungparda.

Gapu iti pigsa ti impact ti panagdinnungparda, natay a dagus da Tuzon ken Campus idinto a nagiwes ti Nissan Patrol a nagpadaya ket dinungparna ti alad ti San Ildefonso Central School.

Saan naan-ano ti drayber ti Nissan Patrol.

Nakaro ti dadael dagiti dua a lugan.

Idi agarup alas 3:30 ti malem ti Enero 2, napasamak met ti aksidente iti Barangay Borono, Tagudin, Ilocos Sur a nakainbolbaran ti Toyota Land Cruiser a minaneho ni Jimmy Somera Sivila, 45, naasawaan, ken residente iti Barangay Quezon, Cabugao, Ilocos Sur ken ti Honda Civic a minaneho ni Police Senior Inspector Redentor Agapinan Arce, 51, hepe ti polis iti Sta. Catalina Municipal Police Station ken residente iti Mindoro, Vigan City.

Mapapati a kimmaut ti lugan ni Arce iti sabali a linia a nakaigapu iti panangdinnungparda iti agpaabagatan a Toyota Land Cruiser.

Nagsagrap ni Arce iti dunor iti dua a sakana ken iti rupana ket naitarayda ken ni Ramona nga asawana nupay di nakaro dagiti sugat daytoy iti Tagudin General Hospital and Capillariasis Center, Tagudin, Ilocos Sur sada naiyalis iti Ilocos Regional Training and Medical Center, San Fernando City, La Union.

Nakaro ti dadael ti sungo dagiti dua a lugan.

Kabayatanna, dead on arrival iti ospital a nakaitarayanna ni Darwin Valdez, 23, baro, ken residente iti Barangay Calongbuyan, Candon City idinto a nadunor da Sammy Valdez y Labanar, 31, baro, agnaed met laeng iti nasao a barangay; ken ni Mark Gravidez, Jr. y Tabuso, 21, baro, ken residente iti Barangay San Pedro, Candon City kalpasan a nagdinnungpar dagiti motorsikloda iti barangay road a sakup ti Paras, Candon City.

Segun iti report, mapapati a nagiwes iti abagatan a lane ti TMX motorcycle a minaneho ni Valdez isu a nakidinnungpar iti agpalaud a MCX motorcycle a minaneho ni Gravidez.

Naitaray dagiti biktima iti Candon City Hospital ngem naideklara ni Darwin Valdez a dead on arrival.

Segun iti inbestigasion, positibo iti alkohol dagiti biktima, saanda a nagaramat iti helmet, ken awananda iti lisensia.#