sinursuran-banner-sqSinursuranNi Jobert M. Pacnis

Umuna Iti Amin, Ti Karadkadtayo

Kolum : Sinursuran

Ni Jobert M. Pacnis

(Maudi a paset)

 

Iti imbestigasion iti napasamak iti Bontoc, rumrummuar a kolorum ti nasao a bus. Plaka ti maysa a bus company ti nakakabit a yellow plate-na idi napasamak ti aksidente. Na-tampered pay dagiti chassis number-na.

Depensa met ti nasao a kompania,  nagatangdan ti 10 a yunit ti Mt. Province Cable Tours isu nga addan kalinteganda a mangusar kadagiti plaka dagitoy. Ken baka isuda ti madaksan no dida agbiahe ta adu ti pasahero a maapektaran. Sa maysa, adda kanon ti petisionda iti opisina ti LTO ngem saan pay laeng a rimmuar, wenno dida pay naala.

Ngem itoy a napasamak, ad-adda la ketdi a nangibunga iti dakkel nga isyo. Ania ti ar-aramiden dagiti maseknan nga ahensia tapno makitada koma ti kaadda latta dagiti kolorum nga agbibiahe iti inaldaw-aldaw? Adda kadi manen nalangsi a maangot kadaytoy a saludsod? Baribari, dayodayo…

Masapul nga agkuti met ti Departamento ti Turismo iti daytoy a pagteng. No kasta a kasta ti mapaspasamak kadagiti pampasahero a lugan, kasano ngarud a maengganyo dagiti turista nga umay agpasiar ditoy pagiliantayo? Awan ti bambanagen dayta battle cry nga “It’s more fun in the Philippines” no kasta. Agbalin laeng daytoy a dekorasion, pagibbusan iti kuarta gapu kadagiti ads.

Ti nasakit pay ditoy a pasamak, awan ti maawat dagiti biktima nga aggapu iti insurance ta kolorum ngarud ti nasao a bus. Nagkas-ang a panunoten. Isu a kaadduan kadagiti kameng ti pamilia dagiti biktima, mangnamnamada lattan iti hustisia a maipaay kadakuada ti gobierno. Ngem ti agdadata a kinapudno, saanen a maisubli ti biag dagiti patpatgenda gapu iti kinakurang dagiti addang a mangguardia koma iti seguridad dagiti pasahero.

Ita a masursurat daytoy, naibilinen ti pannakasuspende (makabulan) ti operasion ti nasao a kompania ti bus. Naikkaten dagiti plate number dagiti bus nga adda iti garahe iti Sampaloc, Manila. Imbilin metten ni Winston Ginez, pangulo ti LTFRB, ti panagkuti dagiti adda iti rehion a kakaduada ti panangikkatda met iti plate number, ken di panangpalugod kadagiti agbiahe a bus iti masakupanda kabayatan ti 30 nga aldaw a suspension ti operasion.

No maduktalan, ken rummuar iti imbestigasion, a nadagsen/adu unay ti nagkabsiwan ti kompania, adda ti amin a bileg ti Board tapno ibabawina/kanselaenna ti CPCs nga intedna— segun iti Executive Order Executive Order 202, Sec 5 (b). Ket maibabawi ti prangkisa ti agarup 228, ken ti 10 a yunit a naggapu iti kompania ti Mt. Province Cable Tours, a yunit ti Florida.

Iti dayta a kaadu dagiti yunit, saan manen nga asi-asi a bilang ti empleado dagiti maapektaran.

“Kagaya ng nabanggit namin nitong pagpasok ng taong 2014, maraming pagbabago ang magaganap sa LTFRB. Hindi kami mag-aatubuling gumamit ng ‘Kamay na Bakal’ para ipakita na seryoso ang Board sa pagpapatupad ng mga batas transportasyon,” dayta ti kuna ni Ginez idi kanselaenda ti prangkisa ti Don Mariano idi Enero 14.

Ngem apay ngata ngarud a napasamak pay laeng ti trahedia idiay Bontoc? Asino ti rumbeng a mapabasol? Board? LTO? DPWH? Ti kompania ti bus? Ti drayber?

Nalpasen, saanen a maisubli ti napasamak. Saludsodentayo ngarud iti bagitayo: Kasanoak a makatulong tapno maikkatan (no di man naan-anay a maikkat) ti aksidente iti kalsada? Suportarantayo ketdi daytoy ilunglungalong dagiti agpampanday ti linteg a pannakapaadda koma ti CCTV ken speed limiters dagiti pampasahero a lugan. Gannuat daytoy a mangmonitor iti mapaspasamak iti lugan. Makita no agob-overspeeding. Kasta met no adda dakes (kas iti panagholdap) a mapaspasamak.

Wen, pasahero, drayber, addaan wenno awanan iti takem, addaantayo amin iti akem para iti pannakailikliktayo iti ania man a disgrasia iti lugan. Masapul nga ammuentayo dagitoy. Ta umuna iti amin, ti karadkadtayo ti rumbeng a kitaentayo… #