Footer

Umuna Iti Amin, Ti Karadkadtayo

Kolum : Sinursuran

Ni Jobert M. Pacnis

(Umuna a paset)

 

 

KASLA kaano laeng ti aksidente a nakatinnagan ti maysa a bus iti Alabang Skyway iti siudad ti Parañaque idi Disiembre itay napan a tawen  a nakaipusingan ti 21 a kailian ken nakasugatan ti 24. Ti bus ti Don Maiano Transit ti ‘superstar’ ditoy. Kasta metten daydi aksidente met laeng ti dua (MGP Trans ken Elena) a bus idi Abril itay napan a tawen a nangkettel met laeng iti biag dagiti dadduma a pasahero. Ken adu pay nga aksidente kadagiti naglabas a panawen.

Napasamak ti imbestigasion kadagita a pasamak agingga a nayulog ti pannakaikkat ti prangkisa ti 78 a unit ti Don Mariano ta naduktalan nga adu unayen dagiti nagkamtudan/nagbasolanna. Ta saan met laeng gayamen a namnaminsan, namnamindua a nairaman daytoy a kompania iti aksidente iti kalsada. Ti makadakes, dida met inikkat dagiti nagbasol a tao/drayberda. Agtultuloy latta ti panagserbi daytoy a kas drayber. Ken imbes a tarimaanenda dagiti paliado a luganda, nayaleng-aleng met. Saan a nakakondision dagiti dadduma a luganda nga agbibiahe kas rimmuar iti imbestigasion idi napasamak ti nakaam-ames nga aksidente a nakairamanan pay ti maysa a lugan a natupakan a nakatayan met dagiti nakalugan.

Adu ti nagreklamo a drayber, ta apay a nasapasapda a nagsagrap iti bunga (18 ti natay, 16 met ti nasugatan) ti kaduada a drayber? Ngem linteg ti linteg. Maipatungpal a maipatungpal. Seguridad pay laeng dagiti pasahero ti kangrunaan.

Anian a nagsayaat koma no sapasap a kasta ti magmagna iti pagilian! Ngem apay ngata ngarud nga adu met latta dagiti ‘mannanakaw’ a naka-sitting pretty kadagiti takemda?

Kadagitoy a napasamak, naiget koman ti pannakamonitor dagiti pampasahero a lugan aglalo kadagiti bus tapno maipasigurado ti kinatalgedda kabayatan ti biahe. Ngem naklaattay’ laengen ta itay Pebrero 7, sabali manen nga aksidente ti napasamak. Maysa manen a bus ti bida— ti G.V. Florida Transport Inc. Natnag daytoy iti maysa a derraas iti Talubin, Bontoc, Mt. Province iti agarup agalas-otso kadayta nga agsapa ti Biernes a nakaipatlian ti 14 a biag ken nakasugatan ti 31.

Pasamak nga arig kagiddan met laeng ti aksidente a nalabsak iti nagbedngan ti ili ti Lal-lo ken Gattaran, Cagayan kadayta nga aldaw. Maysa a pribado a lugan ti dinungpar met laeng ti Florida bus. Iti met ketdi tantiak, awan ti naipatli kadayta a disgrasia ta di met nabaliktad ti nadungpar. Nabettak laeng ti sarming dagiti silaw iti likud. Kasla ‘binisito’ laeng ti bus ti dinungparna.

Iti pannakapasamak daytoy, nagbalin manen a nabara nga isyu ti kinaadda wenno awan ti seguridad dagiti pasahero iti panagluganda kadagiti public utility vehicles (PUVs). Ta numero uno nga akem dagiti addaan iti kastoy a negosio a siertoen ti pannakaipaay kadagiti pasahero ti kinatalgedda nga agbiahe. Isu ngarud a naikkanda iti Certificate of Public Conveniences (CPCs) manipud iti Land Transportation and Franchising Regulatory Board (LFRB).

Segun iti Land Transportation Office, mapan a 34 ti matmatay iti inaldaw gapu kadagiti aksidente iti lugan. Kadawyan nga overspeeding ti kagagapu dagitoy aglalo kadagiti drayber ti bus. Rumrummuar iti panagadal a gapu ta adda kamkamatenda a kota wenno boundary.

Isu a naipaulog ti maysa a linteg tapno maliklikan daytoy. Masuelduan (kas maitutop iti pammilin ti DOLE) dagiti drayber iti binulan – adu man wenno bassit ti mapasaheroanda.

Pagdaksanna, adu latta a kompania dagiti lugan ti saan a sumursurot kadaytoy. Di kad isu latta nga isu a di maikkat ti panagkikinnamat iti kalsada tapno makauna laeng iti pasahero? Gapu met iti ayat a makayawid iti dakkel para iti pamilia, ala, kinnamat. Saanen a panunoten, ta timmayaben dayta kasapulan a disiplina, ti seguridad iti panagmaneho. Saanen a mapanunot nga addada pasahero a rumbeng a maiyeg iti papananda a sitatalged. Saanen a mapanunot no maminsan nga addada agur-uray a pamilia iti tumunggal maysa nga adda iti dayta nga uneg ti lugan.

Iti pay ayat a kumita iti dakkel, agtrabaho iti sobra iti oras. Puyat ken bannog dagiti dumteng ken marikna a dakkel ti epektona iti naannayas a panagmaneho. Saan laeng a dayta. Saan payen a maikkan iti umisu a pannakatsek-ap wenno pannakataripato ti lugan ta arig di aginana a maibiahe. Inton kuan, agloko lattan. Naladawton ti amin ta maysan nga aksidente ti napasamak. a sigurado met a no di mangrissing iti biag, mangdadael iti sanikua ken karadkad.

(Adda tuloyna)