Unity Walk for Peace da Zaragoza ken Chavit, sinaksian dagiti umili iti Narvacan

Unity Walk for Peace da Zaragoza ken Chavit (photo by Eden A. Alviar)

NARVACAN, Ilocos Sur — Sinaksian dagiti adu nga umili iti daytoy nga ili ti Unity Walk for Peace dagiti agsalisal a para mayor ken kakaduada idi agsapa ti Marso 25, 2019.

Nagkaykaysa dagiti rinibu nga umili a nangbuya ti naisangsangayan a panagpagna dagiti agbalubal a para mayor – da sigud a Narvacan Mayor ken sigud a National Tobacco Administration Head Edgardo Zaragoza, ti PDP Laban Party ken sigud a Gobernador ken agdama a Narvacan Councilor Luis “Chavit” Singson ti Bileg Party, ken dagiti kakaduada a kandidato a para bise mayor – da incumbent Vice Mayor Fayinna Pilar Zaragoza-Delgado ken sigud a Vice Governor Atty. Pablito Sanidad, ken dagiti kakaduada a kandidato a para Sangguniang Bayan Member. Nakikaysa pay dagiti kandidato para iti Provincial Government pakairamanan da Gov. Ryan Singson, Vice Gov. Jerry Singson, sigud a Board Member Atty Anicka Zaragoza a kandidato a para bise gobernador, ken dadduma pay a para board member a kandidato ti PDP Laban ken Bileg Party.

Nangrugi ken naggibus ti Unity Walk for Peace iti sanguanan ken asideg ti simbaan ti Parokia ni Nuestra Señora de la Carmen. Nakaaruat iti puraw a t-shirt a bado, naka-short pant ken nakasapatos iti goma ni Ex Mayor Zaragoza. Naka-long sleeve, nakapantalon ken nakasapatos met ni Ex Gov. Singson.

Naminpito a nagrikus da Ex Mayor Zaragoza ken Ex Governor Singson kadagiti kalsada iti sentro ti ili, iti sango ti Municipal Hall ken public market. Nainget ti seguridad nga inwayat dagiti adu a kameng ti Philippine National Police, ken nakordonan iti tali dagiti agsumbangir nga igid dagiti kalsada a nagdaliasatan dagiti agbabalubal a kandidato. Nagdirdir-i dagiti supporters dagiti agsumbangir a partido kabayatan ti ilalabas dagiti kandidato.

Naisardeng ti Unity Walk kalpasan ti maikapito a rikus. Nasaksian dagiti tattao nga iti laksid ti taeng dagiti agbalubal iti kina-mayor iti Narvacan ket kabaelanda pay a lineppas ti Unity Walk no man napaliiw ti agpada a nakaro a panagling-et a senial ti pisikal a bannogda. Iti paggibusan ti Unity Walk, impeksa dagiti dua nga agsalisal iti kinamayor iti panagyamanda iti naurnos a pannakaisayangkat ti pasken tapno mapaneknekan ti salun-atda nga agserbi iti Narvacan.

Impalgak ni Ex Gov. Singson a naipaneknekna a sibibiag ken napigsa pay laeng ken isuna a mismo ti nagna, ken saan a pudno a masaksakiten ken kadobolna ti agparparang iti Narvacan. Nagussob met iti bado ni Ex Mayor Zaragoza tapno ipakitana iti publiko a normal ti langa ti bagina a mangipaneknek ti naan-anay a kinasalun-atna. Inaklonna a ni Ex Gov. Singson ti nakaduana iti Unity Walk. Nagtinnag-ayda pay iti ima iti kasalisalna.

Iti nagsina a pannakiuman ti media kadagiti dua a kandidato, impeksada ti tarigagayda nga agserbi a napudno iti Narvacan. Nagsinnukatda manen kadagiti akusasion ken depensa wenno rason maipapan kadagiti nagduduma nga isyu pakaseknan ti ili ken probinsia kas ti kinadur-as ti Narvacan kurapsion ken black sand mining. Agpadada a tunggal alegasion wenno pammabasol, paglikudan ken rasonan met latta ti maak-akusaran, ken adda met latta pangkontrana iti isyu a maibatbato kenkuana. Iti met pannakiuman kadagiti supporters dagiti dua a partido, nagduduma man dagiti kapanunotan ken suportaranda, ngem nagkaykaysada a ti tarigagayda ket ti nakappia ken natalna nga eleksion iti ilida.

Kalpasan ti Unity Walk, insingasing ti Ilocos Sur Integrated Press a maagay met koma ti debate maipapan kadagiti napateg nga isyu. Kinanunongan daytan ni Ex Mayor Zaragoza ken mayur-uray ti reaksion ni Ex Gov. Singson. Kalkalikaguman dagiti kameng ti media a no maisayangkatto ti debate ket maangay koma iti neutral a disso ken esponsoran daytoy ti Parish Pastoral Council for Responsible Voting a mabigbig ti kinaawan ti kankanunonganna kas maysa nga accredited citizen’s arm ti Commission on Elections.