UNP Hospital, nabendisionan

VIGAN CITY – Nabendisionan itay nabiit ti kabarbaro nga ospital ti University of Northern Philippines.

Kangrunaan a sangaili iti pannakabendision ti nasao nga ospital ni DOH Assistant Regional Director Dr. Benito Arca, ni Vice Mayor Lourdes Baquiran ken dagiti agtuturay iti UNP nga indauluan ni Dr. Gilbert Arce, presidente.

Manamnama ti yaadu dagiti agbasa iti Medisina iti UNP agsipud ta addan daytoy ospital nga agpaay a pag-treningan ken laboratorio dagiti agbasbasa.

Maysa nga Indian national ti timmulong iti pannakaipatakder iti nasao nga ospital kas subad iti nasayaat a nagbanagan ti anakna a nagbasa iti UNP.

Ni Dr. Pablo Quedado ti natudingan nga administrador iti nasao nga ospital.#