UNP, ISNHS, Nagsangalan Elem. Schhol, kampeon iti Binatbatan Streetdancing Competition

VIGAN CITY – Tallo a pagadalan ditoy siudad ti nangiyalat iti umuna a premio iti Binatbatan Streetdancing competition a naangay itay Mayo 2 kas paset ti panangrambak ti siudad ditoy iti Viva Vigan Festival of the Arts.

Inyawid ti University of Northern Philippines ti kampeonato ken ti P50,000 a premio iti Open Category a nakisalipan ti lima a tropa a pakaibilangan ti Sta. Catalina Dance Troupe, Lorma Colleges, San Fernando City, Mindoro Lambaklad ken ti Fuerte, Caoayan.

Iti Category B, nagtabla ti Ilocos Sur National High School ken ti Teodoro Hernaez High School ket nagguduaanda ti P65,000 a premio. Dua laeng a pagadalan ti sekundaria ti nakisalip iti daytoy a kategoria.

Iti Category A, imbalat ti Nagsangalan Elementary School dagiti kinasalipna ket inyawidna ti P30,000 a gunggona. Nakisalip ditoy ti Jose Singson Elem. School, Cabugao Elem. School, San Juan Elem. School ken Salindeg Elem. School.

Ti resulta ti salip: Category A – Nagsangalan Elem. School, 1st, P30,000; San Juan Elem. School, 2nd, P20,000; Jose Singson Elem. School, 3rd, P10,000.00;

Open Category: UNP, 1st, P50,000; Sta. Catalina Dance Troupe, 2nd, P30,000; Lorma College, 3rd, P10,000.

Kapaliiwan a pimmintas ti pasalip iti daytoy a tawen.

Segun ken ni Glenn Concepcion, nangimaton iti parada dagiti nakisalip iti streetdancing competition, bunga daytoy iti panangisayangkat ti city government iti maysa a seminar-workshop no sadino a naawis ti maysa nga eksperto a naglektiur tapno mapasayaat ti execution ken lung-ay dagiti sumasala iti pannakisalipda iti streetdancing competition.#