UNP, kampeon iti PCCL

VIGAN CITY – Nagkampeon ti University of Northern Philippines iti umuna a leg ti Philippine Collegiate Champions League a naangay idi Nobiembre 7-8 itoy a siudad

Imbalat ti UNP men’s basketball team dagiti umaayam manipud iti University of Pangasinan babaen ti score a 95-77.

Sagsaganaan ita ti grupo ti pannakisalipda iti sumaruno a leg a maangay iti Metro Manila a makasangoda dagiti baskelball teams dagiti nalatak nga unibersidad iti National Capital Region.

Segun ken ni Commissioner Joe Lipa, maysa daytoy a wagas tapno makakitada kadagiti kabarbaro a talento manipud kadagiti probinsia,  kasta metten a mapagsasango dagiti nadumaduma a teams saan laeng a dagiti datin a sumalsali iti UAAP ken NCAA.

Malaksid iti UNP ken UPang, karaman pay ti University of the Cordilleras (Baguio City) ken La Union College of Nursing, Arts and Sciences kadagiti team a simmali iti umuna a leg ti PCCL.#