UNP Quimmarayan Campus, sentro ti panagsukisok ken panagdur-as iti agrikultura (Maudi iti dua paset)

Kuna ni Punong Barangay Rogelio Tactay nga immannugot met laeng dagiti maapektaran a mannalon kalpasan a napunas a namimpinsan ti duaduada itoy a proyekto ken naamirisda dagiti benepisio nga ipaayna, saan laeng nga iti barangayda a Quimmarayan no di pay iti ilida a Sto. Domingo.

Naragsakan met ni Mayor Floro Tadena itoy a proyekto a kunana a nagkakammayyetan dagiti maipagpannakkel nga annak ti Sto. Domingo (tubo ti Barangay Lussoc ni Tacbas idinto nga iti Barangay Cabaritan ni Baterina). Agsipud ta awan pay laeng ti pagopisinaan dagiti mangimaton iti campus, indiaya ti mayor ti maysa a bakante a kuarto iti munisipio kas temporario nga opisina ni Dr. Virgilio Gascon, ti officer in charge ti UNP Quimmarayan Campus.

“Makitak ket agkurkurang ti panagsukisok iti benneg agrikultura ditoy pagiliantayo isu nga adun ti agkunkuna a deteriorating daytoy. Inayonmo pay ditan ti nalamiis a panangawat dagiti mannalon kadagiti baro a wagas ti panagtalon,” kinuna ni Baterina idinto nga inyunay-unayna a panawenen a mairugi ti campus.

Dagiti sumaganad dagiti komponente ti masterplan: experimental/model farms, domestic, farm animals raising area, waste management/decomposition area, farm house/storage, forestry area, administration offices, administration training areas, dormitory/sleeping area, parking areas, landscapes, ken seedhouse/herbary/farm equipments.

Kabayatanna, impadamag ni Dr. Tacbas a naaprobaranen ti pondo manipud iti Commission on Higher Education (CHED) ken adda metten maalada manipud iti budget ti UNP.

Kasapulan ti P10 milion para iti maipasdek nga Environmental Science Research and Development Training Center a makalaon iti 150 a katao. Napili nga agbalin a training center imbes a College of Agriculture tapno makapagadal ken makasursuro ditoy uray dagiti ordinario a mannalon.

Impeksa ni Dr. Tacbas ti panagyamanna ken ni Baterina gapu iti nadaras a panangipagnana iti papeles, ken ni San Ildefonso Vice Mayor Amante Purisima III ken kakaduana a donors, ni Mayor Floro Tadena ti Sto. Domingo, Gov. Deogracias Victor Savellano a nangted iti 500 metro kubiko a graba a paggabur, Dr. Alfredo Rabena ti UNP Research and Development Office, Barangay Captain Rogelio Tactay ken Municipal Agriculturist Mamerto Tacbas.

Kiniddaw ni Dr. Tacbas kadagiti agindegiti panangitedda iti amin a suportada itoy a proyekto agsipud ta adda iti imada ti panagballigina.

“No awan ti makitada a development iti lugar, ibabawi dagiti nangidonar iti daga kalpasan ti dua a tawen, isu’t gapuna a sangsangkamaysatayo koma a mangipakita a saanda nga nagbiddut iti panangitdonarda iti lote a nagsaadan ti UNP Quimmarayan campus,” kinuna ni Tacbas.#